საქართველოს მთავრობის ადმინისტრაციაში პრემიერ-მინისტრ ირაკლი ღარიბაშვილის ხელმძღვანელობით ფეხბურთის განვითარების ხელმშემწყობი სამთავრობო კომისიის პირველი სხდომა გაიმართა. კომისიის წევრებმა საქართველოში ფეხბურთის აღორძნებისთვის დაგეგმილ პროექტებზე იმსჯელეს.
საქართველოს პრემიერ-მინისტრის განცხადებით, მთავრობა ყველაფერს გააკეთებს ქართული ფეხბურთის აღორძინებისთვის.
„ამ მიზნით შეიქმნა ფეხბურთის განვითარების ხელმშემწყობი სამთავრობო კომისია. ჩვენ ყველაფერს გავაკეთებთ, რომ შევიმუშაოთ შესაბამისი პოლიტიკა და რეალური ნაბიჯები გადავდგათ ქართული ფეხბურთის აღორძინებისთვის", - აღნიშნა ირაკლი ღარინაშვილმა.
კომისიაში, რომელსაც საქართველოს პრემიერ-მინისტრი ხელმძღვანელობს, შედიან ენერგეტიკის მინისტრი კახა კალაძე, სპორტისა და ახალგაზრდობის საქმეთა მინისტრი ლევან ყიფიანი, ეკონომიკისა და მდგრადი განვითარების მინისტრი გიორგი კვირიკაშვილი, ფინანსთა მინისტრი ნოდარ ხადური, ასევე ფეხბურთის ფედერაციის წარმომადგენლები.
სამთავრობო კომისია მიზნად ისახავს ფეხბურთის განვითარების 5 წლიანი გეგმის შემუშავებას; საფეხბურთო კლუბ¬ბის დაფინანსების გაზრდის მიზნით კერძო ინვესტორების მოზიდვის ხელშეწყობას, ფეხბურთის განვითარების ხელშეწყობის ღონისძიებების დაგეგმვას; მასობრივი ფეხბურთის განვითარების ხელშეწყობას; კომპეტენციის ფარგლებში ფეხბურთის მოყვარულთა და შეზღუდული შესაძლებლობის მქონე პირთათვის ღონისძიებების დაგეგმვას, „უეფას სუპერ თასი 2015" ის მოსამზადებელი სამუშაოების კოორდი¬ნა¬¬ციას; 2017 წელს საქართველოში გასამართი უეფას 19 წლამდელთა ევროპის ჩემპიონატის ფინალური ეტაპის გამართვის ხელშეწყობას.