საქართველოს საპარლამენტო უმრავლესობის ლიდერი და საქართველოს პარლამენტის ჩინეთთან მეგობრობის ჯგუფის ხელმძღვანელი დავით საგანელიძე ჩინეთის სახალხო რესპუბლიკაში ვიზიტის ფარგლებში, პეკინში კომპანია CNEC-ის პრეზიდენტ ბატონ ლი დინგჩენსა და კომპანიის მმართველი ჯგუფის სხვა წარმომდგნელებს შეხვდა. მხარეებმა შეხვედრაზე, საქართველოსა და ამიერკავკასიის რეგიონში მსხვილ პროექტებში ჩინური კომპანიის მონაწილეობის და ინვესტირების საკითხები განიხილეს. დავით საგანელიძემ კომპანიის ხელმძღვანელებს ინფორმაცია მიაწოდა საქართველოში ენერგეტიკული რესურსების, ჰიდრო-ელექტრო, ქარის და თბოელექტროსადგურების მშენებლობასთან დაკავშირებით და ასევე იმ ეკონომიკური რეფორმების შესახებ ისაუბრა, რომელიც ბოლო წელიწადნახევრის განმავლობაში ხორციელდება საქართველოში. თავის მხრივ, ჩინურმა მხარემ საქართველოს დელეგაციას CNEC-ის კომპანიის სხვადასხვა საქმიანობის შესახებ ვიდეოფილმები გააცნო.
შეხვედრის მონაწილეები შეთანხმდნენ სამუშაო ჯგუფის ჩამოსვლაზე საქართველოში პერსპექტიული პროექტების შესწავლისა და დამუშავების მიზნით.
შეხვედრის შემდეგ დავით საგანელიძის და საქართველოს დელეგაციის პატივსაცემად კომპანიის პრეზიდენტის სახელით ოფიციალური მიღება გაიმართა, რომელზეც გაკეთდა საქართველოს ისტორიის, ტრადიციების და ხელოვნების შესახებ მოკლე პრეზენტაცია.
აღსანიშნავია, რომ CNEC წარმოადგენს ჩინეთის ერთ-ერთ უმსხვილეს სახელმწიფო კომპანიას ენერგეტიკის, აეროპორტებისა და საზღვაო პორტების მშენებლობის სფეროში.
სახელმწიფო საინვესტიციო ინსტიტუტებისა და აქტივების მართვის კუთხით კომპანია ჩინეთის რესპუბლიკაში იკავებს მეორე ადგილს და ახორციელებს ბირთვულ, ეროვნული თავდაცვის, ენერგორესურსების, მრეწველობის, საიჟინრო და ინფრასტრუქტურულ პროექტებს ჩინეთსა და მის ფარგლებს გარეთ.
