მარტში საქართველომ 10,1%-ით მეტი ტურისტი მიიღო, ვიდრე გასული წლის ანალოგიურ პერიოდში. როგორც შსს-ს საინფორმაციო-ანალიტიკური დეპარტამენტის მიერ გამოქვეყნებული სახელმწიფო საზღვარზე გადაადგილებულ ვიზიტორთა სტატისტიკური მონაცემებიდან ირკვევა, 2014 წლის მარტის 392 725 ვიზიტით განისაზღვრა, რაც 2013 წლის იგივე პერიოდის მაჩვენებელზე 8%-ით მეტია.
რაც შეეხება იანვარ-მარტის ინტერვალს, ქვეყანაში უკვე 1 006 267 ვიზიტი განხორციელდა, რაც 7,6%-ით აღემატება 2013 წლის ანალოგიური საანგარიშო პერიოდის მაჩვენებელს.
ამასთან, შემოღებული პირობითი დაყოფის მიხედვით, ხვედრითი წილის ურთიერთმიმართება შემდეგია:
ა) ტურისტი - 374 382 ვიზიტი (საერთო რაოდენობის 37,2%, მატება წინა წლის ანალოგიურ მაჩვენებელთან 10,1%);
ბ) ტრანზიტი - 175 805 ვიზიტი (საერთო რაოდენობის 17,5%, მატება წინა წლის ანალოგიურ მაჩვენებელთან 39%);
გ) სხვა - 456 080 ვიზიტი (საერთო რაოდენობის 45,3%, კლება წინა წლის ანალოგიურ მაჩვენებელთან -3%).
სტატისტიკური ინფორმაციის მიხედვით, 2014 წლის მარტშიც ყველაზე მეტი ვიზიტი კვლავ თურქეთიდან (-26%), აზერბაიჯანიდან (+39,9%), სომხეთიდან (+30,7%), რუსეთიდან (+38,8%), უკრაინიდან (+38,5%) და ირანიდან (-43,9%) განხორციელდა. ასევე, პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-მარტშიც კვლავ ტრადიციულად გამოირჩნენ: პოლონეთი, ნიდერლანდები, ლიტვა და იტალია (შესაბამისად 147%, 26%, 24%, და 21%), შუა აზიის ქვეყნებიდან - ყაზახეთი (25%), ხოლო აღმოსავლეთ ევროპის ქვეყნებიდან კი - ბელორუსიის და მოლდოვის მოქალაქეები 40% და 27%-იანი მატებით.