,,პრემიერ-მინისტრმა ნუგზარ წიკლაურის საქმის გამოძიება პირად კონტროლზე აიყვანა", _ამის შესახებ, ჟურნალისტებთან პარლამენტის თავმჯდომარემ დავით უსუფაშვილმა განაცხადა და მომხდარს აღმაშფოთებელი ფაქტი უწოდა.
,, ყველა მოქალაქე უნდა იყოს მშვიდად დღისითაც, ღამით და პარლამენტის წევრის მიმართ მსგავსი მოქმედება, რა თქმა უნდა, კიდევ უფრო დიდი შეშფოთების საბაბს იძლევა. საქმე არის გამოსაძიებელი, რაც შეიძლება სწრაფად. ვიცი, რომ სრულიად სამართალდამცავი სისტემა არის მობილიზებული ამ საკითხებით. მე ვიცი, რომ პრემიერ-მინისტრმა პირად კონტროლზე აიყვანა ეს საკითხი და ჩართულია მის სათანადოდ მოგვარების საქმეში", - განაცხადა დავით უსუფაშვილმა.
შეგახსენებთ, რომ დეპუტატი ნუგზარ წიკლაურს გუშინ ღამე ფიზიკურად გაუსწორდნენ. დეპუტატის თქმით, სახლთან სამი მანქანით რამდენიმე ნიღბიანი დახვდა, რომელთაც მისი გატაცება სცადეს. წიკლაურის თქმით, თავდამსხმელებმა ელექტროშოკიც გამოიყენეს. მომხდართან დაკავშირებით საკუთარ სახლში პროკურორებმა დეპუტატი გუშინვე დაკითხეს. ნუგზარ წიკლაურს სამედიცინო ექსპერტიზაც ჩაუტარდა.