პარლამენტის თავმჯდომარის, დავით უსუფაშვილის განცხადებით, პარლამენტის წევრს ნუგზარ წიკლაურზე განხორციელებულ თავდასხმის ფაქტზე სიამართლის დადგენა და დამნაშავეთა დასჯა მაღალი სახელმწიფოებრივი მნიშვნელობის ამოცანაა.
"მინდა შევუერთდე ყველა მოქალაქის აღშფოთებას ამ ვანდალური ფაქტის თაობაზე. პარლამენტის წევრს, რომელიც გუშინ გვიან სახლში ბრუნდებოდა, როგორც თავად იხსენებს და როგორც მეზობლების ჩვენებიდან ირკვევა, რამდენიმე პირი დაესხა. მას მიაყენეს საკმაოდ მძიმე ფიზიკური შეურაცხყოფა და დაზიანება, თუმცა მის ჯანმრთელობას საფრთხე არ ემუქრება. ასეთი ფაქტი ნებისმიერი მოქალაქის წინააღმდეგ, განსაკუთრებით პარლამენტის წევრის წინააღმდეგ არის სრულიად მოუთმენელი. დარწმუნებული ვარ, სამართალდამცავი ორგანოები, ძალიან მალე, უმოკლეს ვადებში გახსნიან დანაშაულს. ფაქტის მიმართ იქნება განსაკუთრებული ყურადღება", - განაცხადა უსუფაშვილმა.
უსუფაშვილის განმარტებით, მსგავსი ფაქტები გამოუძიებელი არ უნდა დარჩეს და დამნაშავეებმა საკადრისი პასუხი უნდა აგონ.
"როდესაც ვსაუბრობთ ქვეყნის გარშემო შეკრებილ ღრუბლებზე, უნდა ვიყოთ ფრთხილად. სად რა თემები იქნება წინ წამოწეული, სად მოხდება დაძაბულობის შესაძლო ესკალაცია, ჩვენ არ ვიცით, ეს მტერმა იცის. ამიტომ მსგავსი ფაქტები გამოუძიებელი არავითარ შემთხვევაში არ უნდა დარჩეს და დამნაშავეებმა საკადრისი პასუხი უნდა აგონ. ჩვენ ვხედავთ, გარკვეულ გამოცოცხლებებს, გარკვეულ ფიზიკურ შეხლა-შემოხლას სხვადასხვა თემის გარშემო. გაცილებით მეტი ყურადღება გვამრთებს ახლა, რადგან ეს შეიძლება არ იყოს ინდივიდუალური მოვლენები და ფაქტები და შეიძლება ერთიანი ჯაჭვის რგოლებთან გვქონდეს საქმე", - განაცხადა დავით უსუფაშვილმა.
