ჰოსპიტალური ქსელი „ჩემი ოჯახის კლინიკა" ახალი ბრენდითა და ახალი კორპორატიული სტილით - "სამედიცინო კორპორაცია ევექსის" სახელით წარდგა მომხმარებლის წინაშე.
კომპანიის რებრენდინგი განაპირობა მმართველი გუნდისა და ბიზნეს სტრატეგიის ცვლილებამ, რაც გულისხმობს ჰოსპიტალურ ქსელში საერთაშორისო სამედიცინო სტანდარტებთან (JCI) მიახლოებული, პაციენტზე მორგებული სამედიცინო მომსახურების დანერგვას. ევექს-სტანდარტიზაციის შედეგად საქართველოს სამედიცინო სექტორში მნიშვნელოვანი გარდატეხა განხორციელდება და თითოეული რეგიონის მოსახლეობას საშუალება ექნება მიიღოს, ქსელში შემავალ კლინიკებში, მაღალი ხარისხის სამედიცინო მომსახურება.
სამედიცინო კორპორაცია ევექსი ქვეყნის მასშტაბით ყველაზე მსხვილი ჰოსპიტალური ქსელია, რომელიც 6 რეგიონში 36 კლინიკით არის წარმოდგენილი.
განახლებული სტრატეგიის შესაბამისად ევექს-სტანდარტიზაციის ერთ-ერთი უმნიშვნელოვანესი ნაწილია პერსონალისათვის უწყვეტი სამედიცინო განათლების უზრუნველყოფა. სწორედ ამ მიზნით კორპორაციამ დაარსა არასამთავრობო ორგანიზაცია „ქუთაისის სასწავლო და კვლევითი ცენტრი", რომელიც იქნება პირველი სამედიცინო პროფესიული სასწავლო ცენტრი დასავლეთ საქართველოში.
ცენტრი ფუნქციონირების პირველ ეტაპზე მოემსახურება „სამედიცინო კორპორაცია ევექს"-ის სამედიცინო და არასამედიცინო პერსონალს. ხოლო მეორე ეტაპზე განახორციელებს, საქართველოში არსებული სხვადასხვა სამედიცინო ინსტიტუტებისა და ტრენინგების საჭიროებებით დაინტერესებული პირების მომსახურებას.
„ქუთაისის სასწავლო და კვლევით ცენტრში" საერთაშორისო პროფესიულ ასოციაციებსა და ორგანიზაციებთან თანამშრომლობის შედეგად ტრენინგებს ჩაატარებენ როგორც გამოცდილი ქართველი, ისე მოწვეული უცხოელი ექსპეტები.
სწავლების თანამედროვე მეთოდებით, თეორიული ლექცია-სემინარებისა და პრაქტიკული მეცადინეობის გზით ცენტრი უზრუნველყოფს სამედიცინო პერსონალის მუდმივ წვდომას მსოფლიო მედიცინის უახლეს, თანამედროვე მიღწევებზე. სამედიცინო ინფრასტრუქტურით მოწყობილი სიმულაციური სასწავლო კაბინეტები, სატრენინგო აუდიტორიები, საკონფერენციო დარბაზები, კომპიუტერული ლაბორატორია და სხვა დამატებითი ინფრასტრუქტურა, შესაძლებლობას იძლევა ერთდროულად სწავლება ჩაუტარდეს 150-მდე მსმენელს.
„ქუთაისის სასწავლო და კვლევით ცენტრის " გახსნას ქუთაისის მერი შოთა მურღულია დაესწრო.
