„რა ბიზნესი უნდა გაკეთდეს ამ 3-4 შენობაში, რომ ნახევარი მილიარდი ამოიღო? თუ საბაგიროს ბილეთების იმედად არიან ინვესტორები?"-, ასე ეხმიანება „ერთიანი ნაციონალური მოძრაობის" ერთ-ერთი ლიდერი ზურაბ ჯაფარიძე „თანაინვესტირების ფონდის" პროექტს, რომელიც თბილისის ცენტრში მეგაპროექტის „პანორამა თბილისის" მშენებლობას ითვალისწინებს. პროექტის ბიუჯეტი 0,5 მლრდ დოლარია და მისი განხორციელება 1.5 წელში უნდა დაიწყოს.
„ამ „პანორამა თბილისზე" რაც გავიგე: 3 ან 4 ახალი შენობა აშენდება. ერთმანეთს საბაგიროებით და დახრილი ლიფტებით დაუკავშირდება.
რამდენიმე კითხვა: ნახევარი მილიარდი რა ჯდება, 30 ათასი ხის დარგვა თუ იხტიოლოგის მიწა? რა ბიზნესი უნდა გაკეთდეს ამ 3-4 შენობაში რომ ნახევარი მილიარდი ამოიღო? თუ საბაგიროს ბილეთების იმედად არიან ინვესტორები?
პ.ს. ცნობისათვის, იხტიოლოგის „ბინა" არის შეფასებული ფორბსის მიერ „გაწიე-გამოწიე" 40 მილიონ დოლარად
„პანორამა თბილისი" თავისი მასშტაბითა და შინაარსით ოთხ მრავალფუნქციურ კომპლექსს („სოლოლაკის მაღლობი", „სოლოლაკის ბაღები", თავისუფლების მოედანი და ერეკლე II -ს მოედანი) გააერთიანებს.
პროექტის ფარგლებში, ქალაქის ცენტრალური და ისტორიული უბნები გამწვანებულ შემოგარენს საბაგირო გზებითა და დახრილი დიფტებით დაუკავშირდება. პროექტის უნიკალურობა მდგომარეობს იმაში, რომ ქალაქის ახალ 4 მსხვილ ტურისტულ და ბიზნესცენტრს შორის დღის ყველაზე დატვირთულ პერიოდშიც კი გადაადგილება შესაძლებელი იქნება ავტოტრანსპორტის გარეშე, სწრაფად და მოხერხებულად, საბაგირო გზებისა და დახრილი ლიფტების საშუალებით. ამასთან, პანორამული შუშის კაბინებით მგზავრობისას დამთვალიერებელს დედაქალაქის ულამაზესი ისტორიული ხედებით დატკბობის საშუალება მიეცემა. ხსენებული უპირატესობების გათვალისწინებით აღნიშნულ პროექტს მსოფლიოში ანალოგი არ ექნება.
როგორც საქართველოს თანაინვესტირების ფონდში განმარტავენ, პროექტი იმითაც არის შესანიშნავი, რომ იგი მწვანე არქიტექტურის უპრეცედენტო მაგალითს წარმოადგენს. პროექტის ფარგლებში დაირგვება 30 000 ახალი ხე, რაც საგრძნობლად გააჯანსაღებს ქალაქის ეკოსისტემას.
პროექტის დამატებით უპირატესობას წარმოადგენს ასევე, ავტოსადგომების ინფრასტრუქტურის განვითარება. ქალაქის ცენტრსა და შემოგარენში დამატებით 1800 ავტომობილზე გათვლილი მიწისქვეშა ავტოსადგომები მოეწყობა, რაც პროექტის საჭიროებას ბევრად აღემატება და უზრუნველყოფს ქალაქში არსებული პარკირების პრობლემის მოგვარებას.
მრავალფუნქციური კომპლექსის საშუალებით თბილისში შესაძლებელი გახდება მასშტაბური საერთაშორისო კონფერენციების ორგანიზება და მასპინძლობა, რაც თბილისს რეგიონში უფრო დიდ მნიშვნელობას და დატვირთვას შესძენს. დახრილი ლიფტები, საბაგირო გზები და სხვა არქიტექტურული თუ ტექნიკური კომპონენტები, საკმაოდ ძვირადღირებული გადაწყვეტილებებისგან შედგება, რის გამოყენებითაც ფონდი აპირებს, რომ პროექტი გახადოს თბილისის სავიზიტო ბარათი.
როგორც თანაინვესტირების ფონდში განმარტავენ, პროექტის ჯამური ბიუჯეტი 0,5 მლრდ დოლარს აჭარბებს და მისი განხორციელებით დედაქალაქს 270 000 მ2 შეემატება, რომელიც მოიცავს სასტუმროებს, სასტუმროს ტიპის აპარტამენტებს, მაღალი კლასის საოფისე და სავაჭრო ფასებს, საგამოფენო და საკონფერენციო დარბაზებს, გამაჯანსაღებელ და დასასვენებელ ცენტრებს, სპორტულ მოედნებსა და აუზებს და ასევე ყველა იმ აუცილებელ ინფრასტრუქტურას, რომელიც უზრუნველყოფს სტუმრებისათვის სრულყოფილი სერვისების მიწოდებას.
რაც შეეხება პროექტ „სოლოლაკის ბაღები", კომპლექსის ესკიზური პროექტი უკვე დასრულებულია, რომელიც ქალაქის შესაბამის სამსახურებს განსახილველად წარედგინება, ხოლო დანარჩენ კომპლექსებთან დაკავშირებით მიმდინარეობს არქიტექტურული კომპანიის შერჩევის პროცესი, რომელშიც მონაწილეობენ წამყვანი ქართული და უცხოური არქიტექტურული ბიუროები. პროცესი სავარაუდოდ ერთ თვეში დასრულდება და დადგენილი წესით წარდგენილი იქნება განსახილველად.
როგორც თანაინვესტირების ფონდში განმარტავენ, მიმდინარეობს ასევე შესაბამისი ბაზრის კვლევა და კონკრეტული შიდა გეგმარებითი გადაწყვეტილებები მიღებული იქნება მოცემული პერიოდის საბაზრო კონიუქტურის გათვალისწინებით. კომპლექსის ამოქმედება და დატვირთვა მოხდება ეტაპობრივად და სავარაუდოდ დაიწყება 1,5 წელიწადში.
