,,საქართველო მხარს უჭერს რეგიონალური და გლობალური ეკონომიკური ინტეგრაციის საკითხის ზედმიწევნით შესწავლას", _ ამის შესახებ პრემიერ-მინისტრმა ირაკლი ღარიბაშვილმა მოფლიო საბაჟო ორგანიზაციის ევროპის რეგიონის საბაჟო ადმინისტრაციების ხელმძღვანელთა 2014 წლის კონფერენციაზე სიტყვით გამოსვლისას განაცხადა.
ღარიბაშვილის განცხადებით, საქართველო აქტიურადაა ჩართული მსოფლიო საბაჟო ორგანიზაციის მიერ შემუშავებული სტანდარტების დამკვიდრებასა და განხორციელებაში.
,,დღეისათვის ჩვენ აქტიურად ვართ ჩართულები მსოფლიო საბაჟო ორგანიზაციის მიერ შემუშავებული სტანდარტების დამკვიდრებასა და განხორციელებაში. ჩვენს წინაშე არსებული გამოწვევების წარმატებულად გამკლავება და დასახული ამოცანების ზედმიწევნით შესრულება, სწორედაც რომ მსოფლიო საბაჟო ორგანიზაციის მიერ შემუშავებული სხვადასხვა ინსტრუმენტების გონივრული გამოყენებითაა შესაძლებელი, რაც ასევე მნიშვნელოვანია სხვა ქვეყნების საბაჟო ადმინისტრაციებისათვისაც. საქართველო მხარს უჭერს რეგიონალური და გლობალური ეკონომიკური ინტეგრაციის საკითხის ზედმიწევნით შესწავლას, იმ საჭიროებათა და პრიორიტეტული მიმართულებების იდენტიფიცირებას, რაც განსაზღვრავს ეკონომიკური ინტეგრაციის როლსა და შედეგებს.როგორც ეკონომიკური ინტეგრაციის ასევე თავისუფალი ვაჭრობის შესახებ შეთანხმებების იმპლემენტაციის პროცესი შესაძლებელია ითქვას პირდაპირ მოითხოვს სხვადასხვა ქვეყნის საბაჟო ადმინისტრაციებს შორის თანამშრომლობის გაღრმავებასა და გაუმჯობესებას, რაც ქვეყნების ეკონომიკური და საზოგადოებრივი უსაფრთხოების გარანტიაა", _განაცხადა პრემიერმა.
