14 მარტს 11:00 საათზე საქართველოს პარლამენტის ეროვნული ბიბლიოთეკის საგამოფენო დარბაზში ეროვნული ბიბლიოთეკის გენერალური დირექტორი გიორგი კეკელიძე და კომპანია „ჯეოსელის" პრეზიდენტი და აღმასრულებელი დირექტორი პასი კოისტინენი ხელს მოაწერენ ურთიერთთანამშრომლობის მემორანდუმს.
მემორანდუმის ფარგლებში ეროვნული ბიბლიოთეკა და კომპანია "ჯეოსელი" გზავნილით „ერთად შევქმნათ ციფრული „ფოტომატიანე" იწყებენ პროექტს, რომლის მიზანია საქართველოს სხვადასხვა რეგიონში გაფანტული ფოტომასალის მოძიება, მათი გაციფრება და დაარქივება.
მოძიებული იქნება საქართველოს სხვადასხვა კუთხეებში გაბნეული, ძირითადად ოჯახებში შემონახული, უმნიშვნელოვანესი, უნიკალური და საზოგადოებისთვის აქამდე უცნობი მასალები (ფოტოები, დოკუმენტები, საფოსტო ბარათები და სხვ.).
ეროვნული ბიბლიოთეკა მონაწილეობას მიიღებს როგორც მასალის მოძიებასა და შეგროვებაში, ასევე თავისი რესურსებით გააციფრებს მას და განათავსებს ინტერნეტსივრცეში.
პროექტში ვიწვევთ ყველას, ვისაც სურვილი აქვს ეროვნულ ბიბლიოთეკასთან და "ჯეოსელთან" ერთად შექმნას საქართველოს ციფრული ფოტომატიანე.
