ჯაბა სამუშიამ ზოგადად თბილისის გზებზე არსებულ მდგომარეობაზე ისაუბრა და განაცხადა, რომ გზის საფარი არამხოლოდ ქუთაისის ქუჩაზე, არამედ მთელი თბილისის მასშტაბით სავალალო მდგომარეობაშია.

საკრებულოს თავმჯდომარის მოადგილის თქმით, თბილისის 2014 წლის ბიუჯეტში გზების რეაბილიტაციისთვის გამოყოფილი თანხა წინა წლებთან შედარებით გაზრდილია და იგი 64 მილიონ ლარს შეადგენს, თუმცა ამის მიუხედავათ გზებზე სამშენებლო სამუშაოები ჯერაც არ დაწყებულა.

მისივე განცხადებით, თბილისის გზებზე არსებული მდგომარეობა საზოგადოების სამართლიან უკმაყოფილებას იწვევს, რადგან დედაქალაქში არ დარჩა არც ერთი უბანი, სადაც გზის საფარი არ იყოს დაზიანებული, თუმცა პრობლემასთან მიმართებაში გამგებელთა ინერტიულობა საბოტაჟს უფრო წააგავს.

დეპუტატმა ასევე ხელოვნურად გაჭიანურებული ტენდერების თაობაზეც ისაუბრა და აღნიშნა, რომ გამგეობები ამ გზით ცდილობენ ამჟამინდელი ხელისუფლების თითქოსდა უუნარობის წარმოჩენას.

ჯაბა სამუშია ასევე აცხადებს, რომ 7 მარტამდეც, ანუ 1/12-ის ხარჯვის პირობებშიც და დღესაც, როდესაც თბილისს უკვე აქვს ბიუჯეტი, გამგეობებს აქვთ საკმარისი თანხები, რათა ავარიული გზების სრული რეაბილიტაცია მოხერხდეს.