,,საქართველო ინვესტორებს შესანიშნავ ადგილმდებარეობას და 900-მილიონიან ბაზარს სთავაზობს", _ამის შესახებ, სპრემიერ-მინისტრმა ირაკლი ღარიბაშვილმა საქართველო-ისრაელის ინოვაციების მეორე ფორუმის - „საქართველო კარიბჭე" გახსნაზე განაცხადა.
ირაკლი ღარიბაშვილის განმარტებით, კანონის უზენაესობა და კერძო საკუთრების დაცვა ხელისუფლების პრიორიტეტია და მთავრობა ძალ-ღონეს არ იშურებს, რომ საქართველო ბიზნესის წარმოებისთვის მსოფლიოში ერთ-ერთ ყველაზე ხელსაყრელ ქვეყნად იქცეს.
როგორც პრემიერ-მინისტრმა აღნიშნა, საქართველო, ინვესტირებით დაინტერესებულ პირებს სთავაზობს ბიზნესშესაძლებლობების დიდ არჩევანს ქვეყნის ისეთ სწრაფად მზარდ სფეროებში, როგორიცაა ჰიდროენერგეტიკა, ტურიზმი, მრეწველობა, რეგიონალური მომსახურება, ლოგისტიკა და აგრობიზნესი.
„მოგეხსენებათ, მიმდინარეობს მუშაობა საქართველო-ისრაელის თავისუფალ სავაჭრო ხელშეკრულებაზე და დარწმუნებული ვარ, უახლოეს მომავალში მივაღწევთ შედეგებს. ინვესტორებს ვთვაზობთ - მყარ სუვერენულ ბალანსს; ლიბერალურ საგადასახადო სისტემას, რაც გულისხმობს დაბალი გადასახადების მხოლოდ ექვს ფიქსირებულ ტიპს; კონსერვატიულ საბანკო სექტორს; განვითარებულ სატრანსპორტო ინფრასტრუქტურას ვაჭრობის, ლოგისტიკისა და წარმოებისათვის, რაც მოიცავს მულტიმოდალურ საზღვაო, სახმელეთო და საჰაერო კომუნიკაციებს; კონკურენტული ფასებით და სტაბილურად მიწოდებულ ენერგორესურსებს; კვალიფიციურ სამუშაო ძალას კონკურენტული ტარიფებით", -აღნიშნა საქართველოს პრემიერ-მინისტრმა.
ირაკლი ღარიბაშვილი ფორუმზე შეკრებილ ბიზნესმენებს დაჰპირდა, რომ მათ მიერ საქართველოში განხორციელებული ინვესტიციის თითოეული ცენტი დაცული იქნება; სამართლიანი, გამჭვირვალე და უსაფრთხო საინვესტიციო გარემოს გარანტორი კი თავად არის.
