საქართველოს პრემიერ-მინისტრის სპეციალური წარმომადგენლის ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის შეხვედრა უკვე მეორედ გადაიდო. პრემიერის პრესსამსახურის ინფორმაციით, მხარეებს შორის 14 მარტს დაგეგმილი შეხვედრა უახლოეს პერიოდში გაიმართება.
,,დღეს გაიმართა რუსეთის ფედერაციასთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის ზურაბ აბაშიძის სატელეფონო საუბარი რფ-ის საგარეო საქმეთა მინისტრის მოადგილესთან გრიგორი კარასინთან. მიღწეულ იქნა შეთანხმება, რომ ქართულ-რუსული დიალოგის ფარგლებში ა/წ 14 მარტისათვის დაგეგმილი შეხვედრა გაიმართოს უახლოეს რამდენიმე კვირაში (შეხვედრის თარიღი დაზუსტდება). საუბრის დროს დადასტურდა ქართულ-რუსული დიალოგის გაგრძელების მნიშვნელობა", _ნათქვამია პრემიერის პრესსამსახურის განცხადებაში.
შეგახსენებთ, რომ რომ კარასინსა და აბაშიძეს შორის შეხვედრა მარტის დასაწყისში პრაღაში უნდა გამართულიყო. როგორც ,,ჯი-ეიჩ-ენთან" საუბარში აბაშიძემ განაცხადა აღნიშნული შეხვედრა თავად კარასინის მოთხოვნით გადაიდო და მორიგი შეხვედრა 14 მარტს უნდა გამართულიყო.
