მიმდინარე წლის 10 მარტს, ფინანსთა მინისტრი ნოდარ ხადური თსუ ეკონომიკის საერთაშორისო სკოლის სტუდენტებსა და პროფესორ-მასწავლებლებს შეხვდა და დეტალური ინფორმაცია მიაწოდა მაკროეკონომიკური პარამეტრებისა და ქვეყნის ეკონომიკაში დღეს არსებული მდგომარეობის შესახებ.
ასევე გააცნო საქართველოს სოციალურ-ეკონომიკური განვითარების სტრატეგიის ,,საქართველო 2020" ძირითადი მიმართულებები. მინისტრმა ხაზი გაუსვა ,,საქართველო 2020" მნიშვნელობას და აღნიშნა, რომ სტრატეგია მიზნად ისახავს ქვეყანაში ინკლუზიურ/ყოვლისმომცველ ეკონომიკურ ზრდას.
როგორც ფინანსთა მინისტრმა განმარტა, პროექტი საბოლოო დამტკიცებამდე საჯაროა ყველასთვის, რადგან სამინისტროსთვის მისაღები და საყურადღებოა საზოგადოების თუნდაც ყველაზე კრიტიკული, თუმცა ჯანსაღი მოსაზრება. მინისტრმა სტუდენტებს სთხოვა, აქტიური მონაწილეობა მიიღონ დოკუმენტის განხილვაში, რომელიც გამოქვეყნებულია ფინანსთა, ეკონომიკისა და მდგრადი განვითარების სამინისტროების ვებ-გვერდებზე.
„სტუდენტებთან ვისაუბრეთ ეკონომიკაში მიმდინარე პროცესებზე, გავაცანით ჩვენი ხედვა ქვეყნის სოციალურ-ეკონომიკური განვითარების სტრატეგიის თაობაზე. სტუდენტების მხრიდან ძირითადი შეკითხვები სწორედ სტრატეგიის განხორციელების ღონისძიებებს შეეხო, თუ როგორ აპირებს ქვეყანა დასახული მიზნისკენ სვლას. რაც შეეხება სტრატეგიის დამტკიცების ვადებს, დოკუმენტი ჯერ ისევ განიხილება საჯარო სივრცეში, მხოლოდ ამის შემდეგ მოხდება მისი განხილვა მთავრობის სხდომაზე," - აღნიშნა ფინანსთა მინისტრმა,ნოდარ ხადურმა.
„ჩვენთვის მნიშვნელოვანია ფინანსთა მინისტრთან, ნოდარ ხადურთან შეხვედრა ორი ფაქტორის გამო. ერთი, რომ საქართველოს მთავრობამ შეიმუშავა ქვეყნის განვითარების საინტერესო სტრატეგია და მეორე ის, რომ დოკუმენტი დამტკიცემადე განიხილება აკადემიურ წრეებში. დღეს, სტრატეგია განიხილეს თსუ ეკონომიკის საერთაშორისო სკოლის ეკონომისტებმა და მომავალმა ეკონომისტებმა. ვფიქრობ, ჩვენი იდეები და მოსაზრებები გარკვეულ დადებით წვლილს შეიტანს სტრატეგიის შემუშავებაში," - განაცხადა თსუ ეკონომიკის საერთაშორისო სკოლის აღმასრულებელმა დირექტორმა, ერიკ ლივნიმ.
,,დღევანდელი პრეზენტაცია ძალიან მნიშვნელოვანი იყო ISET-ის სტუდენტებისათვის. მნიშვნელოვანია ის ფაქტიც, რომ ფინანსთა მინისტრის მეშვეობით გავიგეთ 2020 წლისთვის დაგეგმილი სტრატეგიული ცვლილებები ჩვენს ეკონომიკაში. მისასალმებელია ისიც, რომ დამტკიცებამდე დოკუმენტის გაცნობა ხდება სხვადასხვა სექტორის წარმომადგენლებისთვის, სტუდენტებისთვის. ფინანსთა მინისტრმა დღეს მოისმინა ჩვენი შეხედულებები და იდეები, რაც ვფიქრობთ მნიშვნელოვანი იქნება დოკუმენტის ავტორებისთვის" - განაცხადეს შეხვედრის დასრულების შემდეგ ISET-ის სტუდენტმა.
შეხვედრაში მონაწილეობა მიიღეს მაგისტრატურის პირველი და მეორე კურსის სტუდენტებმა, ასევე უნივერსიტეტის პროფესორებმა და მკვლევარებმა.
შეხვედრა ინტერაქტიულ რეჟიმში წარიმართა. ფინანსთა მინისტრმა უპასუხა სტუდენტების მიერ დასმულ შეკითხვებს.