„ერთიანი ნაციონალური მოძრაობის" ერთ-ერთი ლიდერი, ეუთოს საპარლამენტო ასამბლეის ვიცე-პრეზიდენტი, გიგი წერეთელი პარიზში ასამბლეის პრეზიდენტ რანკო კრივო კაპიჩთან ერთად ევროსაბჭოს საპარლამენტო ასამბლეის პრეზიდენტს ან ბრასოს და ევროპის საბჭოს გენერალურ მდივანს ტორბიონ იანგლანდს შეხვდა.
შეხვედრების ძირითადი თემა უკრაინაში მიმდინარე მოვლენები და საპარლამენტო ასამბლეათა შორის კოორდინაცია და თანამშრომლობა იყო. გამოითქვა მოსაზრება, რომ ეუთოს და ევროსაბჭოს საპარლამენტო ასამბლეები აქტიურად ჩაერთვებიან მოლაპარაკების პროცესში და ასევე მიიღებენ ქმედით ზომებს უკრაინის ტერიტორიული მთლიანობის დაცვისათვის და პროცესის მშვიდობიანად და კანონიერად განვითარებისათვის. ევროსაბჭოს ლიდერებთან დისკუსიისას, გიგი წერეთელმა აღნიშნა, რომ მართლაც აუცილებელია ეფექტური და მკაცრი ზომების გატარება, იმისათვის, რომ რუსეთმა შეაჩეროს აგრესიული მოქმედება. საქართველოს მაგალითმა ძალიან კარგად აჩვენა ყველას, რომ მხოლოდ მოლაპარაკება და რბილი ტონი რუსეთის ხელმძღვანელობასთან არ არის შედეგიანი და გაცილებით უკეთესი იქნება ამ ვითარებაში გადაწყვეტილება სხვადასხვა ტიპის სანქციებზე, მათ შორის პოლიტიკური, ეკონომიკური, სავიზო და ასე შემდეგ.
ქალბატონმა ან ბრასომ შეხვედრის მონაწილეებს მიაწოდა ინფორმაცია, რომ ბრიტანელი დეპუტატის რობერტ დოვლტერის ინიციატივით, ევროპის საბჭოში იწყება ხელმოწერების შეგროვება რუსეთის დელეგაციისათავის უფლებამოსილების ჩამორთმევის საკითხზე, ხოლო გენერალურმა მდივანმა იანგლანდმა, აღნიშნა, რომ ის პირადად მიემგზავრება კიევში, რათა შეხვდეს უკრაინის ხელისუფლებას და აღმოუჩინოს ქმედითი დახმარება.
გიგი წერეთელმა დელეგაციის წევრებთან ერთად მონაწილეობა მიიღო ევროპის საბჭოს მუდმივმოქმედი კომიტეტის მუშაობაში და საფრანგეთის სენატში გამართულ შეხვედრებში.
