საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი სამუშაო ვიზიტით ესპანეთის სამეფოში იმყოფება.
10 მარტს საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, ესპანეთის სამეფოს საგარეო საქმეთა მინისტრთან ხოსე მანუელ გარსია მარგალიოსთან და ესპანეთში საქართველოს ელჩთან ზურაბ პოლოლიკაშვილთან ერთად, ესპანეთის 250-ზე მეტი მსხვილი კომპანიის წარმომადგენელს შეხვდა და მათთან ორი ქვეყნის ეკონომიკური თანამშრომლობის განვითარების საკითხები განიხილა.
საქართველოს ვიცე-პრემიერმა ესპანელ ბიზნესმენებს საქართველოს საინვესტიციო შესაძლებლობები გააცნო, შემდეგ კი კითხვა-პასუხის რეჟიმში დეტალურად ესაუბრა საქართველოს ეკონომიკის იმ სფეროების შესახებ, რომელთა არსებული მდგომარეობა და საინვესტიციო მიმზიდველობა ფორუმზე დამსწრე კომპანიების წარმომადგენლებს განსაკუთრებულად აინტერესებდათ. კერძოდ, საუბარი შეეხო საქართველოს ენერგეტიკაში, ფინანსურ სექტორში, მრეწველობაში, ტურიზმში, სატრანსპორტო და ლოგისტიკურ სფეროებში არსებულ ვითარებას და ამ მიმართულებით ურთიერთანამშრომლობის განვითარების შესაძლებლობებს.
„ესპანეთთან, როგორც ერთ-ერთ ძალიან მნიშვნელოვან პოლიტიკურ პარტნიორთან, ეკონომიკური თანამშრომლობა არის უმნიშვნელოვანესი. ჩვენ მათ გავუზიარეთ ის შესაძლებლობები, რასაც დღეს საქართველოში ეკონომიკა იძლევა და ის მიმართულებები, რაც ძალიან პრიორიტეტულია ჩვენთვის. მთლიანობაში, ვფიქრობ, ძალიან მნიშვნელოვანი ვიზიტია, რადგან ესპანეთთან ვაჭრობა იზრდება. ინვესტიციები ესპანეთიდან ძალიან ცოტაა და გვინდა ეს შეუსაბამობა გამოვასწოროთ", - აღნიშნა გიორგი კვირიკაშვილმა.
საქართველოს ვიცე-პრემიერის განცხადებით, აღნიშნული შეხვედრა უნისონშია ასოცირების ხელშეკრულებასთან და იმ სავაჭრო შეთანხმებასთან, რომლის ხელმოწერაც მიმდინარე წლის აგვისტოშია დაგეგმილი. „მინდა აღვნიშნო, რომ დღევანდელ ღონისძიებაზე შეკითხების ძალიან დიდი ნაწილი ეხებოდა სიტუაციას უკრაინაში. ისევე როგორც ჩვენ, ესპანელებსაც ძალიან აღელვებთ იქ მიმდინარე ვითარება და რა თქმა უნდა, გამოვხატეთ ძალიან დიდი მხარდაჭერა უკრაინის მიმართ", - განაცხადა გიორგი კვირიკაშვილმა.
,,ის ფაქტი, რომ ესპანეთის საგარეო საქმეთა მინისტრი დაესწრო ფორუმს, კიდევ ერთხელ ადასტურებს იმ თანადგომას, რომელსაც ესპანეთი უცხადებს საქართველოს ევროკავშირთან და ევროატლანტიკურ სივრცეში ინტეგრაციის თვალსაზრისით. ვფიქრობ, სწორედ ამიტომ არის აუცილებელი, რაც შეიძლება მეტი ევროპული კომპანია იყოს წარმოდგენილი საქართველოში, რადგან პოლიტიკური წარმატების თვალსაზრისით აუცილებელია, ასევე ეკონომიკური მჭიდრო თანამშრომლობა ევროპულ ქვეყნებთან", - აღნიშნა საქართველოს ელჩმა ესპანეთის სამეფოში ზურაბ პოლოლიკაშვილმა.
ესპანეთში ვიზიტის ფარგლებში ასევე დაგეგმილია საქართველოს ვიცე-პრემიერის, ეკონომიკისა და მდგრადი განვითარების მინისტრის, გიორგი კვირიკაშვილის შეხვედრები ესპანეთის სამეფოს ვაჭრობის სახელმწიფო მდივანსა და ესპანეთის სამეფოს ტურიზმის, ენერგეტიკისა და მრეწველობის მინისტრთან, ასევე საგარეო ვაჭრობისა და ინვესტიციების სააგენტოს წარმომადგენლებთან.
გარდა ამისა, საქართველოსა და ესპანეთის მთავრობებს შორის ერთობლივი ეკონომიკური კომიტეტი შეიქმნება, რომლის ხელმოწერაც აღნიშნული ვიზიტის ფარგლებშია დაგეგმილი.