,,ნაცმოძრაობა" ევროპული სახელმწიფოების მხრიდან რუსეთის მიმართ დაკისრებულ სანქციებს სრულ მხარდაჭერას უცხადებს. ამის შესახებ, პარტიის ოფისში გამართულ პრესკონფერნციაზე ,,ნაცმოძრაობის" წევრმა ნუგზარ წიკლაურმა განაცხადა.
,,ამერიკის შეერთებულმა შტატებმა, კანადამ და ევროპულმა სახელმწიფოებმა გამოაქვეყნეს სანქციების პირველი პაკეტი რუსეთის ფედერაციის წინააღმდეგ, რომლის მიზანია ამ ქვეყნის მხრიდან სუვერენული უკრაინის ტერიტორიული მთლიანობის ხელყოფის, სამხედრო აგრესიის და ინტერვენციის შეწყვეტა", _განაცხადა წიკლაურმა რომელმაც დაწესებული სანქციების მიმართ პარტიის მხარდაჭერა დააფიქსირა.
,,ერთიანი ნაციონალური მოძრაობა" სრულ მხარდაჭერას უცხადებს თავისუფალი სამყაროს ლიდერ სახელმწიფოებს, მათ მიერ შემუშავებულ სანქციებს და მოკავშირეთა უსაფრთხოების გაძლიერებისკენ მიმართულ ქმედით ნაბიჯებს, რომელთა მიზანია რუსეთის აგრესიული ქმედებების აღკვეთა როგორც უკრაინის, ისე საქართველოს წინააღმდეგ", _განაცხადა წიკლაურმა.
ნუგზარ წიკალაურის განმარტებით, ,,ქართული ოცნების" უპასუხისმგებლო პოზიციის გამო როცა უარყო უკრაინასთან დაკავშირებით ,,ერთიანი ნაციონალური მოძრაობის" მიერ პარლამენტში წარდგენილი რეზოლუცია, რომელშიც გამოთქმული იყო რუსეთის წინააღმდეგ ამოქმედებული სანქციების სრული მხარდაჭერა ამით, საქართველო ცივილიზებული სამყაროსგან იზოლირებული აღმოჩნდა.
,,როგორც ცნობილია, ,,ქართული ოცნების" საპარლამენტო უმრავლესობამ გასულ კვირას უარყო ,,ერთიანი ნაციონალური მოძრაობის" მიერ პარლამენტში წარდგენილი რეზოლუცია, რომელშიც გამოთქმული იყო რუსეთის წინააღმდეგ ამოქმედებული სანქციების სრული მხარდაჭერა. ,,ქართული ოცნების" უპასუხისმგებლო პოზიციის გამო საქართველო იზოლირებული აღმოჩნდა ცივილიზებული სამყაროს ერთიანი ძალისხმევისგან და არ გამოხატა პრინციპული სახელმწიფოებრივი პოზიცია უმნიშვნელოვანეს საკითხზე, რომელიც პირდაპირ უკავშირდება ჩვენი ქვეყნის ტერიტორიულ მთლიანობას და დეოკუპაციის პრობლემის წარმატებულ გადაჭრას", _განაცხადა წიკლაურმა.
