მთავრობის ადმინისტრაციაში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა შეხვედრა გამართა პოლონეთის საგარეო საქმეთა სამინისტროს პოლიტიკურ დირექტორ იაროსლავ ბრატკიევიჩსა და ესპანეთის საგარეო საქმეთა სამინისტროს პოლიტიკურ დირექტორთან იგნასიო იბანიეს რუბიოსთან.
შეხვედრაზე საუბარი შეეხო უკრაინაში მიმდინარე მოვლენებს, რუსეთის აგრესიულ ქმედებებს უკრაინის წინააღმდეგ და რეგიონის, მთლიანად ევროპისა და საერთაშორისო სტაბილურობისათვის არსებულ საფრთხეებს.
შეხვედრაზე განიხილეს საქართველოში მიმდინარე დემოკრატიული რეფორმები, საქართველოს ევროპულ და ევროატლანტიკურ სტრუქტურებში ინტეგრაციის პერსპექტივები და ამ მიმართულებით ერთოვბლივი ძალისხმევის გაძლიერების შესაძლებლობა.
„ძალიან მნიშვნელოვანია, რომ ევროინტეგრაციის პროცესების თვალსაზრისით ასეთ გადამწყვეტ პერიოდში საქართველოში ვიზიტად იმყოფებიან პოლონეთისა და ესპანეთის მაღალი რანგის დიპლომატები, რომლებიც გამოხატავენ მხარდაჭერას საქართველოს ტერიტორიული მთლანობისადმი და საქართველოს ევროინტეგრაციული და ევროატლანტიკური პროცესების დაჩქარებისადმი.
შეხვედრაზე ვიმსჯელეთ ასოცირების შეთანხმების ხელმოწერის მნიშვნელობასა და დაჩქარების შესაძლებლობებზე, განვიხილეთ ვითარება უკრაინაში და აბსოლუტური თანხვედრაა ჩვენს ხედვაში, რომ დღეს ხორციელდება სამხედრო აგრესია უკრაინის წინააღმდეგ რუსეთის შეიარაღებული ძალების მხრიდან და ძალიან მნიშვნელოვანია, რომ ევროკავშირი, აშშ და დემოკრატიული თანამეგობრობა აძლიერებს ძალისხმევას იმისთვის, რომ მოხდეს საერთაშორისო ნორმებში და საერთაშორისო ჩარჩოებში რუსეთის მოქცევა და რა თქმა უნდა, უკრანის ტერიტორიული მთლიანობის პატივისცემა. დიდი მადლობა მათ კიდევ ერთხელ ასეთი აქტიური პოლიტიკური მხარდაჭერისთვის„ -განაცხადა შეხვედრის დასრულების შემდეგ ალექსი პეტრიაშვილმა.
თავის მხრივ, პოლონეთისა და ესპანეთის საგარეო საქმეთა სამინისტროს პოლიტიკურმა დირექტორებმა ჟურნალისტებთან საუბარში თავიანთი ვიზიტი შეაფასეს, როგორც საქართველოს მიმართ მხარდაჭერად ევროპულ და ევროატლანტიკურ სივრცეში გაწევრიანების გზაზე არსებულ გამოწვევებში და ასევე, კმაყოფილება გამოხატეს იმ პროცესების მიმართ, რაც მიმდინარეობს საქართველოში ქვეყნის ევროპულ, დემოკრატიულ მოდერნიზებულ სახელმწიფოდ ჩამოყალობების კუთხით.
