ა/ო „ადამიანი, კანონი, თავისუფლებას" თავმჯდომარე, გიორგი ჭულუხაძე და აღმასრულებელი დირექტორი, ნიკოლოზ მაღალდაძე სამცხე-ჯავახეთის გუბერნატორს, ბატონ აკაკი მაჭუტაძეს შეხვდნენ
შეხვედრაზე საუბარი რეგიონში არსებულ პრობლემებსა და გუბერნიის სამომავლო გეგმებს შეეხო. როგორც ორგანიზაციისთვის გახდა ცნობილი, გუბერნიასა და მუნიციპალიტეტს შორის კავშირი თითქმის გაწყვეტილი იყო. ამ დროისათვის მუნიციპალიტეტის წარმომადგენლებთან პერმამენტული სამუშაო შეხვედრები იმართება.
აკაკი მაჭუტაძის განცხადებით, გუბერნატორის ადმინისტრაციის მთავარ პრიორიტეტს სასმელი წყლის მილებისა და საირიგაციო სისტემის სრული რეაბილიტაცია წარმოადგენს. დაგეგმილია 2013 წლის ინრფასტრუქტურული პროექტების დასრულება და ახალი პროექტების განხორციელება, რომლისთვისაც რეგიონული განვითარებისა და ინფრასტრუქტურის სამინისტროს მიერ 12 მილიონი ლარია გამოყოფილი.
შეხვედრისას საუბარი ტურიზმის განვითარებასაც შეეხო. როგორც გუბერნატორმა აღნიშნა, ამ მიმართულებით პრიორიტეტული სამონასტრო კომპლექს „საფარას" გზის რეკონსტრუქცია და აბასთუმნის ობსერვატორიის სრული რეაბილიტაციაა. ამ დროისათვის ტურისტული დაინტერესების მთავარ ობიექტს რაბათის ციხე წარმოადგენს. ზემოხსენებული კომპლექსის და ობსერვატორიის რეაბილიტაცია განიხილება, როგორც რეგიონის განვითარების მნიშვნელოვანი პოტენციალი, რაც დასაქმების ზრდას და ადგილობრივი მოსახლეობის სოციალური პირობების გაუმჯობესების უზრუნველყოფს.
შეხვედრაზე გამახვილდა ყურადღება ორგანიზაციის მიერ ჩატარებულ კვლევაზე, რომელიც ეხებოდა წინა ხელისუფლების პერიოდში, 2010-2013 წლებში გაცემულ პრემიებს და დანამატებს. კვლევამ აჩვენა, რომ სამცხე-ჯავახეთის წინა გუბერნატორის პირობებში, მხოლოდ 2013 წელს, ადმინისტრაციაში 453 ათასი ლარი გაიცა ხელფასის სახით, ხოლო გაცემულმა პრემიამ 43 ათას ლარს გადააჭარბა. გარდა ამისა, 13 680 ლარი შტატგარეშე თანამშრომელთა ანაზღაურებაზე გაიცა.
ადამიანი, კანონი, თავისუფლება დაინტერესდა თუ რა მდგომარეობაა ამ კუთხით სამცხე-ჯავახეთის რეგიონში ახალი გუბერნატორის დანიშვნის შემდგომ. როგორც მაჭუტაძემ განმარტა, დანიშვნის შემდეგ პრემიების და დანამატების გაცემა არ მომხდარა.
ა/ო ადამიანი, კანონი, თავისუფლება მიმდინარე თვის ბოლოს ქვეყნის მასშტაბით გუბერნატორის ადმინისტრაციებს მიმართავს და 2014 წლის პირველი კვარტლის ბიუჯეტის ხარჯვით ნაწილს გამოითხოვს.