დღეს, 7 მარტს, 16 საათზე საქართველოს ტექნიკური უნივერსიტეტის ადმინისტრაციულ კორპუსში, დიდ სააქტო დარბაზში, საქართველოს ეროვნული გმირის, აფხაზეთის ავტონომიური რესპუბლიკის თავდაცვის საბჭოსა და მინისტრთა საბჭოს თავმჯდომარის, ჟიული შარტავას დაბადებიდან 70 წლისთავისადმი მიძღვნილი საიუბილეო ღონისძიებების დასკვნითი საღამო მოეწყობა. დაგეგმილია ჟიული შარტავას სახელობის ახალგაზრდა პოლიტიკოსთა სკოლის პრეზენტაცია.
საზეიმო ღონისძიებაზე მოწვეულნი არიან მთავრობისა და პარლამენტის წევრები, არასამთავრობო ორგანიზაციების, სპორტული ფედერაციების წარმომადგენლები, კულტურის სფეროს მოღვაწეები, ჟიული შარტავას ოჯახის წევრები, ნათესავები, მეგობრები და ახლობლები.
შეგახსენებთ: საქართველოს ეროვნული გმირის, აფხაზეთის ავტონომიური რესპუბლიკის თავდაცვის საბჭოსა და მინისტრთა საბჭოს თავმჯდომარის, ჟიული შარტავას დაბადებიდან 70 წლისთავისადმი მიძღვნილი საიუბილეო კონფერენცია "ქართული პოლიტიკის თანამედროვე პრობლემები" საქართველოს ტექნიკურ უნივერსიტეტში 5 მარტს გაიხსნა. ღონისძიება აფხაზეთის ავტონომიური რესპუბლიკის მინისტრთა საბჭოს თავმჯდომარემ, ვახტანგ ყოლბაიამ გახსნა. კონფერენციაში მონაწილეობდნენ საქართველოს ტექნიკური უნივერსიტეტის რექტორი არჩილ ფრანგიშვილი, საქართველოს რეგიონული განვითარებისა და ინფრასტრუქტურის მინისტრი დავით ნარმანია, საქართველოს ფინანსთა მინისტრი ნოდარ ხადური, საქართველოს განათლებისა და მეცნიერების მინისტრი თამარ სანიკიძე, ქართველი ისტორიკოსი, საზოგადო მოღვაწე, საქართველოს მეცნიერებათა აკადემიის აკადემიკოსი როინ მეტრეველი, სტუ-ის სრული პროფესორი შალვა ნაჭყებია და სხვები.
ამასთან, სტუ-ის ადმინისტრაციული კორპუსის მესამე სართულზე მოეწყო ჟიული შარტავას ცხოვრებისა და მოღვაწეობისადმი მიძღვნილი ფოტოგამოფენა.
ჟიული შარტავა 1944 წლის 7 მარტს სენაკში დაიბადა. იყო ქართველი პოლიტიკური მოღვაწე, აფხაზეთის ავტონომიური რესპუბლიკის მინისტრთა საბჭოს თავმჯდომარე (1993). დახვრიტეს აფხაზმა სეპარატისტებმა სოხუმის დაცემის დღეს, 1993 წლის 27 სექტემბერს. სიკვდილის შემდეგ მინიჭებული აქვს საქართველოს ეროვნული გმირის ტიტული.
ჟიული შარტავამ დაამთავრა საქართველოს პოლიტექნიკური ინსტიტუტი. მუშაობდა ინჟინრად; შემდეგ იყო კომკავშირულ და პარტიულ თანამდებობებზე თბილისსა და რუსთავში. 1980-იან წლებში იყო საქართველოს სსრ უმაღლესი საბჭოს წევრი. 1992 წ. არჩეული იყო დამოუკიდებელი საქართველოს პარლამენტში რუსთავის მაჟორიტარ დეპუტატად.
აფხაზეთში შეიარაღებული კონფლიქტის დროს, 1993 წლის ივნისში, რუსულ და აფხაზურ პოლიტიკურ წრეებში ფართო კავშირების მქონე შარტავა ედუარდ შევარდნაძემ დანიშნა აფხაზეთის ავტონომიური რესპუბლიკის მინისტრთა საბჭოსა და აფხაზეთის დაცვის საბჭოს თავმჯდომარედ. სოხუმის დაცემის დღეს არ დატოვა ქალაქი. აფხაზურმა სეპარატისტულმა დაჯგუფებამ ტყვედ აიყვანა და დახვრიტა. მოგვიანებით, შარტავას ცხედარი ქართულ მხარეს გადაეცა. დაკრძალულია თბილისში, საბურთალოს პანთეონში. 2004 წელს, სიკვდილის შემდეგ, დაჯილდოვდა ეროვნული გმირის ორდენით.
