საკრებულოს თავმჯდომარის ირაკლი შიხიაშვილის განცხადებას საკრებულოს ფრაქციის "ნაციონალური მოძრაობა-რეფორმატორები" თავმჯდომარე ეხმიანება. თემურ გრიგალაშვილმა დედაქალაქის მოსახლეობას და ასევე ყველა იმ არასამთავრობო ორგანიზაციას, რომელიც დედაქალაქის ბიუჯეტის დამტკიცებისთვის იბრძოდა, მადლობა გადაუხადა და აღნიშნა, რომ ერთობლივი ძალისხმევით პირველი წარმატება იქნა მიღწეული.
"ვფიქრობ, ჩვენ ერთობლივი ძალისხმევით მივაღწიეთ პირველ წარმატებას და ეს წარმატება მდგომარეობს იმაში, რომ საკრებულოს თავმჯდომარე იძულებული გახდა გვერდზე გადაედო საკუთარი პოლიტიკური ამბიციები და ბიუჯეტზე მუშაობა დაეწყო. ჩვენ ჯერჯერობით ბიუჯეტს არ ვიცნობთ, თუმცა ჩვენი შეთავაზება კვლავ ძალაშია, რადგან ვთვლით, რომ უბიუჯეტობას ირაკლი შიხიაშვილის შედგენილი ბიუჯეტი მაინც ჯობია. ჩვენ გავეცნობით შემოთავაზებულ პროექტს და საბიუჯეტო კოდექსის 78 მუხლის 6 პუნქტის შესაბამისად, ყველაფერს გავაკეთებთ, რათა ყველა ის საჭირობოროტო საკითხი, რომელიც დღესდღეობით ჩვენს მოსახლეობას აწუხებს, მოგვარდეს'',-განაცხადა თემურ გრიგალაშვილმა.
შეგახსენებთ, რომ ირაკლი შიხიაშვილის განცხადებით, თბილისის საკრებულომ ბიუჯეტის პროექტის საკუთარი ვერსია შეიმუშავა, რომელსაც დღესვე თბილისის მერის მოვალეობის შემსრულებელს გააცნობს.
