თბილისის საკრებულომ ბიუჯეტის პროექტის საკუთარი ვერსია შეიმუშავა, რომელიც დედაქალაქის მერიას რეგულაციებს უწესებს.
ამის შესახებ, თბილისის საკრებულოს თავმჯდომარემ ირაკლი შიხიაშვილმა დღეს გამართულ ბრიფინგზე განაცხადა და აღნიშნა, რომ თბილისის საკრებულო ყოველთვის იჩენდა პრინციპულობას და იყო შეუვალი იმ საკითხში, რომ დედაქალაქის ბიუჯეტი თბილისელებზე ყოფილი ორიენტირებული და მორგებული.
საკრებულო ყოველთვის იდგა მყარ პოზიციაზე, თუმცა, სწორედ ამის გამო მისი მისმართით შავი პიარი და ტერორი მიმდინარეობდა.
"ჩვენ არ დავუშვით და არ მივიღეთ ისეთი ბიუჯეტი, რომელიც დასახარჯად ყოფილ და ბრალდებულ მერს ჭირდებოდა.
ამიტომ არაერთი დღის დაუღალავი შრომის შედეგად, თბილისის საკრებულომ ბიუჯეტის საკუთარი ვერსია შეიმუშავა. აღნიშნულ პროექტში ჩვენს მიერ ყველა ის რეგულაცია იქნა გათვალისწინებული, რომლის საშუალებითაც ბიუჯეტის ხარჯვით ნაწილზე კონტროლის განხორცილება გახდება შესაძლებელი. ამით კი ჩვენ შევზღუდავთ მერიას, რომელიც "ნაციონალური მოძრაობის" ფილიალად არის გადაქცეული", - განაცხადა შიხიაშვილმა.
მისევე ინფორმაციით, დღეს 14:00 საათისთვის მერის მოვალეობის შემსრულებელი სევდია უგრეხელიძე საკრებულოშია დაბარებული, რათა მას ბიუჯეტის ალტერნატიული პროექტი წარედგინოს.
შიხიაშვილი თქმით, ბიუჯეტის მე-4 პროექტი, რომელიც თბილისის მერიის მიერ არის წარმოდგენილი, ასევე " ჩასაგდებადაა განწირული". ამიტომ იგი იმედოვნებს, რომ დეპუტატები სწორედ საკრებულოს მიერ შემუშავებულ პროექტს დაუჭერენ მხარს.
"საკრებულოს მორიგი სხდომა ხვალისთვის არის ჩანიშნული, თუმცა, საჭიროების შემთხვევაში, სხდომა შესაძლოა, 11 მარტამდე სხვა ნებისმიერ რიცხვშიც ჩაინიშნოს'',-აღნიშნა შიხიაშვილმა
