საქართველოს პარლამენტმა გასული წლის ბოლო რიგგარეშე სხდომაზე კონსტიტუციის გადასინჯვის მიზნით, სახელმწიფო საკონსტიტუციო კომისია დააკომპლექტა.
საკონსტიტუციო კომისიის პირველი სხდომა რამდენიმე დღის წინ, 3 მარტს გაიმართა. სხდომაზე არ ყოფილა საუბარი კომისიის თავმჯდომარესთან არსებულ მრჩეველთა საბჭოს დაკომპლექტებაზე, რის შესახებაც პოზიცია ბატონმა დავით უსუფაშვილმა 27 დეკემბერს, კომისიის შექმნისას დააფიქსირა. როგორც მაშინ აღინიშნა, პროექტის მომზადების პროცესში ზემოხსებული საბჭო მნიშვნელოვანი ინსტრუმენტი იქნებოდა და კომისიას ოპონირებასაც კი გაუწევდა.
„საქართველოს ახალგაზრდა კონსტიტუციონალისტთა ასოციაცია" წლების განმავლობაში მუშაობს კონსტიტუციურ-სამართლებრივი ბაზის ანალიზზე, თავისი წვლილი შეაქვს საზოგადოებაში ცნობიერების ამაღლებასა და კონსტიტუციურ-სამართლებრივი პრინციპების პოპულარიზაციის საქმეში. აგრეთვე, აქტიურად შეისწავლის უცხოურ გამოცდილებას და სისტემატიურად აწვდის საკანონდემბლო ორგანოს სარეკომენდაციო პაკეტებს. ორგანიზაციამ გასულ წელს განახორციელა პროექტი: „ახალგაზრდები კონსტიტუციური ცვლილებებისთვის". აღნიშნული პროექტის ფარგლებში, ქვეყნის რვა რეგიონში - მესტიაში, ახალციხეში, ზუგდიდში, ქუთაისში, თელავში, ბათუმში, მარნეულსა და გორში არაერთი ფართომასშტაბიანი შეხვედრა გამართა ასოციაციის ეგიდით. პროექტში მონაწილე 500-მდე მეტ ბენეფიციარსა და ზემოაღნიშნულ რეგიონებში მცხოვრებ ახალგაზრდებს, საშუალება ჰქონდათ მოესმინათ ტრენინგ-სემინარები კონსტიტუციონალიზმის ძირეულ საკითხებზე. ხოლო პროეტის დასრულების შემდეგ მომზადდა ახალგაზრდული ხედვის მადეკლარირებელი პუბლიკაცია, რომლის გაცნობის საშუალება მიეცათ როგორც კანონმდებლებს, ისე, ფართო საზოგადოებას.
გარდა ამისა, „საქართველოს ახალგაზრდა კონსტიტუციონალისტთა ასოციაცია" პერმანენტულად მართავს ღონისძიებებს რომელიც მიმართულია ახალგაზრდული ორგანიზაციებისა და სტუდენტური საინიციატივო ჯგუფების ჩართულობის უზრუნველყოფისკენ ქვეყანაში მიმდინარე კონსტიტუციურ პროცესებში.
ყოველივე ზემოთქმულის ფონზე, ორგანიზაცია მომავალშიც ურყევად გააგრძელებს ახალგაზრდებთან აქტიურ მუშაობას და მაქსიმალურად შეუწყობს ხელს მათ მონაწილეობას საკონსტიტუციო რეფორმაში.
იქიდან გამომდინარე, რომ ასოციაციას არ მიეცა საშუალება უშუალოდ მიეღო მონაწილეობა საკონსტიტუციო კომისიის საქმიანობაში, მივმართავთ პარლამენტის თავმჯდომარეს, ბატონ დავით უსუფაშვილს შეიქმნას მრჩეველთა საბჭო. ხსენებული ორგანო როგორც „საქართველოს ახალგაზრდა კონსტიტუციონალისტთა ასოციაციას", ისე სხვა არასამთავრობო ორგანიზაციებს და კონსტიტუციური სამართლის მკვლევარებს, საშუალებას მიცემს აღნიშნულ ფორმატში მაინც ჩაერთოს ქვეყნის ძირითადი კანონის გადასინჯვის პროცესში.