5 მარტს საგარეო საქმეთა მინისტრი მაია ფანჯიკიძე ჟენევაში, გაეროს ადამიანის უფლებათა საბჭოს 25-ე სხდომაზე სიტყვით გამოვა. აღსანიშნავია, რომ ეს გახლავთ საქართველოს საგარეო საქმეთა მინისტრის პირველი გამოსვლა ადამიანის უფლებათა საბჭოს მაღალი დონის სეგმენტის ფარგლებში, რომელშიც მონაწილეობენ მთავრობის მეთაურები და საგარეო საქმეთა მინისტრები.
სიტყვით გამოსვლისას, საგარეო საქმეთა მინისტრი დამსწრე საზოგადოებას გააცნობს ქვეყანაში მიმდინარე რეფორმებსა და ადამიანის უფლებათა სფეროში მიღწეულ პროგრესს. ამასთან, მინისტრი ყურადღებას საქართველოს ოკუპირებულ რეგიონებში ადამიანის უფლებათა დაცვის კუთხით არსებულ შემაშფოთებელ მდგომარეობაზე გაამახვილებს. განსაკუთრებული ყურდღება რუსეთის უკანონო ქმედებებს დაეთმობა, კერძოდ, საოკუპაციო ხაზის გასწვრივ მავთულხლართების გაბმისა და მიწაყრილების მოწყობის პროცესს, რამაც მნიშვნელოვნად გააუარესა ადგილობრივი მოსახლეობის ჰუმანიტარული და ადამიანის უფლებათა მდგომარეობა.
ვიზიტის ფარგლებში გაიმართება მინისტრის ორმხრივი შეხვედრა გაეროს ადამიანის უფლებათა უმაღლეს კომისართან ქ-ნ ნავანეთემ პილაისთან.
დემოკრატიის განმტკიცებისა და ადამიანის უფლებათა დაცვისა და ხელშეწყობის მიზნით გაწეული მნიშვნელოვანი ძალისხმევისა და საქართველოს მთავრობის მზაობის გათვალისწინებით გააძლიეროს თანამშრომლობა ადამიანის უფლებათა საბჭოს ფარგლებში, მაია ფანჯიკიძემ ოფიციალურად გაახმოვანა საქართველოს სურვილი გახდეს ადამიანის უფლებათა საბჭოს წევრი 2016-2018 წლებში.
