მსოფლიო ბანკი საქართველოს საბაჟო პროცედურების გამარტივებას და საგარეო ვაჭრობის წახალისებაში ეხმარება. მსოფლიო ბანკის ინფორმაციით, ბანკის ჯგუფის საინვესტიციო გარემოს გაუმჯობესების საკონსულტაციო პროგრამა საქართველოს შემოსავლების სამსახურს საბაჟო პროცედურების გამარტივებაში უწყობს ხელს, რაც სავაჭრო პროცედურებზე საჭირო დროის შემცირებას და საგარეო ვაჭრობის წახალისებას ისახავს მიზნად.
მსოფლიო ბანკის ჯგუფის წევრმა, საერთაშორისო საფინანსო კორპორაციამ (IFC), გაეროს ვაჭრობისა და განვითარების კონფერენციასთან(UNCTAD) თანამშრომლობით, საბაჟო ინფორმაციის ინტეგრირებული სისტემის განახლება მოახდინა. ამ სისტემას საქართველოს შემოსავლების სამსახური სავაჭრო ოპერაციების მართვის მიზნით იყენებს. სისტემის მოდერნიზება და გაუმჯობესება გამოიწვევს საბაჟო პროცედურების დახვეწას და გამარტივებას.
`ეს სისტემა საბაჟო ადმინისტრირების ეფექტიანობას აამაღლებს. ASYCUDAWorld-ის სისტემის განახლება უაღრესად მნიშვნელოვანია შემოსავლების სამსახურისთვის. სისტემას საფუძვლად უდევს თანამედროვე ტექნოლოგიები, რომლებიც აუცილებელია საინფორმაციო ტექნოლოგიების ახალ ერაში საბაჟოს ეფექტიანად ფუნქციონირებისთვის"- განაცხადა შემოსავლების სამსახურის უფროსმა ირაკლი გვარამაძემ.
ამ ინიციატივის შედეგად შემოსავლების სამსახურის და სხვა სტრუქტურების მონაცემების უფრო ეფექტიანი გაცვლის და მათი თავსებადობის შესაძლებლობა გაჩნდა. გაცილებით სრულყოფილი, ეფექტიანი და ადვილი ხდება კერძო სექტორისათვის ინფორმაციის მიწოდება. მუშავდება ახალი მოდულები, რომლებიც ხელს შეუწყობს სამსახურის რისკების სისტემის ეფექტიან მუშაობას.
`ეს ინიციატივა ნაწილია ჩვენი ძალისხმევისა, რომელიც საქართველოში კერძო სექტორის განვითარების ხელშეწყობას ისახავს მიზნად. სწორედ ამ მიზნით ჩვენ ვმუშაობთ, რათა შეიქმნას მარტივი, ეფექტიანი და ბიზნესისთვის მისაღები რეგულირების მექანიზმები და ამავე დროს, დაცული იყოს საზოგადოებრივი ინტერესები. ინფორმაციის ინტეგრირებული სისტემის განახლება საქართველოს საბაჟოზე საგარეო ვაჭრობის წახალისებას შეუწყობს ხელს"- აცხადებს IFC-ის რეგიონული მენეჯერი სამხრეთ კავკასიაში თომას ლუბეკი.
აღსანიშნავია, რომ ინიციატივა საქართველოს საინვესტიციო გარემოს გაუმჯობესების პროექტის ფარგლებში განხორციელდა. პროექტს საერთაშორისო საფინანსო კორპორაცია ახორციელებს და მას ფინანსურ მხარდაჭერას უწევენ ავსტრიის ფინანსთა სამინისტრო, BP და მისი პარტნიორები ნავთობისა და გაზის პროექტებში, და ნორვეგიის კერძო სექტორისა და ინფრასტრუქტურის განვითარების სატრასტო ფონდი.
გაეროს ვაჭრობისა და განვითარების კონფერენცია, რომელსაც 194 წევრი ქვეყანა განაგებს, გაეროს ორგანიზაციაა, რომელიც მუშაობს განვითარებაზე ორიენტირებულ თემებზე, მათ შორის საერთაშორისო ვაჭრობის საკითხებზე, რაც განვითარების ერთ-ერთი მთავარ მამოძრავებელ ძალადაა მიჩნეული.
