„საქართველოს ახალგაზრდა კონსტიტუციონალისტთა ასოციაცია" გმობს 1921 წლის 25 თებერვალს ბოლშევიკური წითელი არმიის მიერ თბილისისა და შემდგომ მთლიანად საქართველოს ოკუპაციის ფაქტს. ასოციაცია პატივს მიაგებს 93 წლის წინ საქართველოს თავისუფლებისთვის თავგანწირული თითოეული ქართველის ხსოვნას და გამოარჩევს მათ უდიდეს ღვაწლს სამშობლოს წინაშე.
სამწუხაროა, რომ 1921 წელს იმდროინდელი საერთაშორისო საზოგადოება მზად არ აღმოჩნდა წინააღმდეგობა გაეწია რუსული არმიის მიერ საერთაშორისო-სამართლებრივი ნორმების უხეში დარღვევისთვის. ასოციაციის პოზიციით, დღეს-დღეობით კვლავ არ არსებობს საერთაშორისო-სამართლებრივი ნორმების დაცვის ეფექტური მექანიზმები, რომლებიც მსგავსი შემთხვევების თავიდან აცილების გარანტიას მოგვცემდა. ოკუპაციის საფრთხე თანამედროვე მსოფლიოში კვლავ მომდინარეობს იმ ქვეყნებისგან, რომელთაც წარსულში უკვე დაგროვილი აქვთ მსგავსი პრაქტიკა.
აღნიშნულის ფონზე, ასოციაცია იმედოვნებს რომ უკრაინაში განვითარებული მოვლენები არ გახდება საერთაშორისო-სამართლებრივი პრინციპებისა და ნორმების დარღვევის კიდევ ერთი საფუძველი და საერთაშორისო თანამეგობრობა არ დაუშვებს უკრაინაში ინტერვენციის მცდელობასაც კი.
