შვედეთში საქართველოს საელჩოში საქართველოს შვედ მეგობართა ასოციაციის ყოველწლიური საანგარიშო შეხვედრა გაიმართა.
შეხვედრისას სიტყვით გამოვიდა საქართველოს საგანგებო და სრულუფლებიანი ელჩი შვედეთის სამეფოში კონსტანტინე ქავთარაძე, რომელმაც მოკლედ მიმოიხილა შვედურ-ქართული ორმხრივი ურთიერთობები, საქართველოს ევროინტეგრაციის პროცესში მიღწეული წარმატებები, ოკუპირებულ ტერიტორიებზე არსებული მდგომარეობა. მან ასევე აღნიშნა 2013 წელს შვედეთში საქართველოს პოპულარიზაციის კუთხით საელჩოს მიერ გაწეული საქმიანობაც.
ელჩმა სტუმრებს საელჩოს ეგიდით გამოცემული სამეცნიერო ბროშურა წარუდგინა, რომელიც ვიკინგების ხანის ქართულ-შვედურ კავშირებსა და საქართველოს ისტორიულ და კულტურულ მემკვიდრეობას ეხება. იგეგმება ამ ბროშურის გავრცელდება შვედეთის უმაღლეს სასწავლებლებში, როგორც დამხმარე სახელმძღვანელო არქეოლოგიისა და ისტორიის ფაკულტეტების სტუდენტებისა და პროფესორ-მასწავლებლებისთვის.
კონსტანტინე ქავთარაძემ აღნიშნა, რომ სამეცნიერო ბროშურის გამოცემა ნაწილია საელჩოს გრძელვადიანი პროექტისა, რომელიც საქართველოში ვიკინგების კვალის მოძიების მიზნით, ერთობლივი ქართულ-შვედური არქეოლოგიური გათხრების დაწყებას ითვალისწინებს, რაც არა მხოლოდ სამეცნიერო თვალსაზრისით შეიძლება აღმოჩნდეს საინტერესო, არამედ, შვედეთში საქართველოს პოპულარიზაციასაც შეუწყობს ხელს.
ელჩმა ქართულ-შვედურ ურთიერთობებში შეტანილი მნიშვნელოვანი წვლილისთვის საელჩოს სამახსოვრო მედლებით დააჯილდოვა ასოციაციის წევრები: უპსალას უნივერსიტეტის პროფესორი, ცნობილი შვედი ენათმეცნიერი და ქართველოლოგი იოაკიმ ენვალი, შვედეთის ყოფილი საპატიო კონსული საქართველოში ერიკ იონსონი და სტოკჰოლმის უსაფრთხოებისა და განვითარების ინსტიტუტის ექსპერტი, ვეროკავშირის ყოფილი ელჩი საქართველოში პერ ეკლუნდი.
შეხვედრაზე მოწვეულმა ნობელების შთამომავალმა თომას თიდენმა საზოგადოებას შესთავაზა პრეზენტაცია ძმები ნობელებისა და მე-20 საუკუნის დასაწყისში მათი კომპანიის „BraNobel"-ის საქართველოში საქმიანობის შესახებ.
ასოციაციის პრეზიდენტმა სვენ ჰოლმსტრომმა ორგანიზაციის წევრების სახელით მადლობა გადაუხადა ელჩს თანამშრომლობისა და მხარდაჭერისთვის.
ასოციაცია 2009 წელს დაარსდა და მისი მიზანი შვედურ-ქართული ურთიერთობების წახალისებაა. შვედეთში საქართველოს პოპულარიზაციის მიზნით, საელჩო ხელს უწყობს ამგვარი ორგანიზაციების ჩამოყალიბებას და აქტიურად თანამშრომლობს მათთან. უკვე ტრადიციად იქცა, რომ შვედ მეგობართა ასოციაცია თავის საანგარიშო შეხვედრებს საელჩოში ატარებს.
