,,საქართველოს ახალგაზრდა კონსტიტუციონალისტთა ასოციაცია" ქართული კონსტიტუციონალიზმის განვითარებაში შეტანილი განსაკუთრებული წვლილის მქონე იურისტ-კონსტიტუციონალისტის გამოსავლენად სპეციალურ გამოკითხვას ატარებს. ხსენებული გამოკითხვა 20 თებერვლამდე გაგრძელდება, ხოლო გამოვლენილი ნომინანტის დაჯილდოვება სიმბოლური პრიზით 21 თებერვალს გაიმართება, რადგან სწორედ 1921 წლის 21 თებერვალს მიიღო საქართველოს დემოკრატიული რესპუბლიკის დამფუძნებელმა კრებამ ქვეყნის პირველი კონსტიტუცია.
„აღნიშნული ღონისძიება უკვე მესამედ იმართება და ვცდილობთ, რომ ეს ყოველწლიურ ტრადიციად დამკვიდრდეს. 2012 წელს ასოციაციის სპეციალური ჯილდო ავთანდილ დემეტრაშვილს გადაეცა, ხოლო 2013 წელს ირაკლი კობახიძეს. დიდი იმედი გვაქვს, რომ ამჯერადაც იმ კონსტიტუციონალისტზე შეაჩერებს საზოგადოება არჩევანს, რომელსაც მართლაც დიდი წვლილი მიუძღვის ქართული კონსტიტუციონალიზმის განვითრებაში." - აცხადებს ასოციაციის პრეზიდენტი, თორნიკე ჭეიშვილი.
საქართველოს ახალგაზრდა კონსტიტუციონალისტთა ასოციაციის მიერ ორგანიზებულ გამოკითხვაში მონაწილეობის მიღება ნებისმიერ მსურველს შეუძლია. ამისათვის ასოციაციის ოფიციალურ ვებ-გვერდზე: www.gyca.ge სპეციალური აპლიკაციაა მომზადებული.