„პი-ემ-სის" კვლევითმა ცენტრმა „საქართველოს საშუალოვადიანი ფისკალური პოლიტიკის მდგრადობის ანალიზის" პრეზენტაცია გამართა.
ღონისძიება პროგრამის საჯარო პოლიტიკის, ადვოკატირების და
სამოქალაქო საზოგადოების განვითარება საქართველოში (G-PAC) მხარდაჭერით ჩატარდა, რომელიც ამერიკის შეერთებული შტატების განვითარების სააგენტოს (USAID) მიერაა დაფინანსებული და აღმოსავლეთ-დასავლეთის ინსტიტუტის მიერ ხორციელდება.
როგორც „პი-ემ-სი კვლევითი ცენტრი" განმარტავს, საჯარო დისკუსიის მიზანი 2013 წლის ფისკალური შედეგების მიმოხილვა და ფისკალურ მდგრადობაზე გავლენის მქონე რისკების გამოვლენაა. შეხვედრაზე,
განხილულ იქნა 2013 წლის ეკონომიკური ზრდის მაჩვენებლები, 2013 წლის ნაერთი ბიუჯეტის შესრულების და 2014-17 წლების ბიუჯეტის დაგეგმილი და საპროგნოზო პარამეტრები, დღეისათვის საქართველოს ფისკალური მდგრადობის წინაშე არსებული და შესაძლო გამოწვევები.
„2013 წელს არსებობდა ეკონომიკური ზრდის შემანელებელი ობიექტური და
სუბიექტური ფაქტორები. 2013 წლის გეგმასთან შედარებით ნაერთი ბიუჯეტის ხარჯები უფრო მეტად შემცირდა ვიდრე შემოსავლები, რამაც განაპირობა მოსალოდნელი დეფიციტის შემცირება. ნაერთი ბიუჯეტის შემოსავლების 539 მილიონიანი დანაკლისი ძირითადად დღგ-დან შემოსავლის შემცირებამ გამოიწვია, ხოლო ბიუჯეტის ხარჯების შემცირება ინფრასტრუქტურული, სოციალური უზრუნველყოფის და საქონელისა და მომსახურების შეძენის ხარჯების შემცირებით არის გამოწვეული. 2014 წელს ბიუჯეტის დეფიციტის და სახელმწიფო ვალის პარამეტრები გაუარესდა, როგორც ნომინალურ ისე ფარდობით მაჩვენებლებში, თუმცა საშუალოვადიანი ფისკალური პარამეტრები არ ცდება მდგრადობის ზღვრულ
მაჩვენებლებს" - განაცხადა „პი ემ სი" კვლევითი ცენტრის ეკონომისტმა ბესიკ
ნამჩავაძემ.
პრეზენტაციას ასევე ესწრებოდნენ შესაბამისი სამთავრობო სტრუქტურებისა და აღნიშნულ საკითხებზე მომუშავე არასამთავრობო და კვლევითი ორგანიზაციებისა და დიპლომატიური კორპუსის წარმომადგენლები.
