თბილისის 2014 წლის ბიუჯეტის დამტკიცების მიზნით, საკრებულოს სხდომა 31 იანვარს უნდა იქნეს მოწვეული, აღნიშნულის შესახებ საუბარია თბილისის მერიის მიერ გავრცელებულ განცხადებაში.
„ჯი-ეიჩ-ენი" აღნიშნულ განცხადებას გთავაზობთ უცვლელად:
„თბილისის საკრებულოს უმრავლესობა განაგრძობს საკრებულოს თავმჯდომარის გუშინდელი უპასუხისმგებლო, კანონსაწინააღმდეგო და თვითნებური გადაწყვეტილების გამართლებას თბილისის 2014 წლის ბიუჯეტის განხილვის მისი მოთხოვნიდან 2 საათში დანიშვნის შესახებ.
ვინაიდან აშკარაა, რომ საკრებულოს თავმჯდომარე და ,,ქართული ოცნების" წარმომადგენლები ვერ აცნობიერებენ საკითხის სერიოზულობას, ასევე ვერ ერკვევიან კანონმდებლობაში გვინდა განვუმარტოთ შემდეგი:
თბილისის მერის მოვალეობის შემსრულებლის მიერ 2014 წლის 24 იანვარს მოთხოვნილი იქნა საკრებულოს თავმჯდომარისაგან ერთი კვირის ვადაში დაუყოვნებლივ მოეწვია საკრებულოს სხდომა თბილისის ბიუჯეტის დასამტკიცებლად. როგორც ირაკლი შიხიაშვილმა განმარტა მან ,,გონივრულ" ვადაში, 2 საათში დანიშნა ბიუჯეტის განხილვა, რაც არასერიოზული დამოკიდებულებაა საკითხისადმი. ასევე, გუშინდელ სხდომაზე თბილისის ბიუჯეტის განხილვა, საკრებულოს კომისიებში მისი წინასწარი განხილვის გარეშე, იყო უკანონო მოქმედება, რაზეც თბილისის მერიამ გუშინ გაავრცელა განცხადება (რაც შეეხება ამ საკითხზე, საკრებულოს იურიდიულ საკითხთა კომისიის თავმჯდომარის განმარტებას, მისი უკიდურესი დილეტანტობის გამო, მასზე დამატებითი განმარტების გაკეთებას საჭიროდ არ მივიჩნევთ). თბილისის მერიის მოთხოვნა მიზნად ისახავდა რეგლამენტით გათვალისწინებული ერთი კვირის გამოყენებას კომისიების მუშაობისა და კონსულტაციებისათვის და მხოლოდ ამის შემდეგ საკრებულოს სხდომაზე ბიუჯეტის განხილვას.
ზემოაღნიშნულიდან გამომდინარე, ირაკლი შიხიაშვილსა და ,,ქართული ოცნების" წარმომადგენლებს გვინდა ავუხსნათ და მივუთითოთ, რომ თბილისის 2014 წლის ბიუჯეტის დამტკიცების მიზნით, სხდომა კანონმდებლობის დაცვით უნდა იქნას მოწვეული გონივრულ ვადაში, 2014 წლის 31 იანვარს, ხოლო ამ ერთი კვირის განმავლობაში, როგორც უკვე გუშინ განვმარტეთ, უნდა გაიმართოს კომისიების სხდომები, შეხვედრები საკრებულოს ცალკეულ წევრებსა თუ ამ საკითხით დაინტერესებულ საზოგადოების ნებისმიერ წარმომადგენელთან, მათ შორის არასამთავრობო ორგანიზაციებთან და გაზიარებული უნდა იქნას ყველა გონივრული წინადადება.
ამასთან, თუ ირაკლი შიხიაშვილი კანონმდებლობისა და თბილისელების ინტერესების საწინააღმდეგოდ ერთი კვირის ვადაში ამჯერად უკვე კანონმდებლობის დაცვით არ მოიწვევს საკრებულოს რიგგარეშე სხდომას, აშკარა გახდება, რომ მათი პოზიცია არის მხოლოდ ჯიუტი მცდელობა ექიშპონ თბილისის მერიას, მიუხედავად იმისა, რომ რაც მეტი დრო გადის ბიუჯეტის დაუმტკიცებლობით მით მეტად მნიშვნელოვნად ილახება თბილისელების ინტერესები"- ნათქვამია განცხადებაში.
