ექსპოზიციაზე წარმოდგენილი იქნება: აკადემიის სათაო შენობის ფოტომატიანე. XIX საუკუნის 70-80 - იან წლებში გადაღებული ფოტოები; XX საუკუნის სხვადასხვა წლებში გადაღებული შენობისა თუ მისი ცალკეული ელემენტების ამსახველი ფოტოები; ფოტომატიანეს დაასრულებს შენობის ექსტერიერისა და ინტერიერის 2009/13 წლებში გადაღებული ფოტოები, რომლებზეც თვალნათლივ ჩანს, თუ როგორი კალეიდოსკოპური სისწრაფით იცვლება მდგომარეობა უარესობისაკენ.
ფოტომატიანის ერთ საინტერესო ნაწილს შეადგენს XIX საუკუნის ბოლო ოცწლეულსა და XX საუკუნის 20-30 -იან წლებში შესრულებული იმ საზოგადო მოღვაწეთა ჯგუფური პორტრეტები, რომლებიც უშუალოდ იყვნენ დაკავშირებული სამხატვრო აკადემიასთან.
გამოფენის ასევე ექსპონირებული იქნება: სამხატვრო აკადემიის მუზეუმის ფონდებში დაცული სახვითი ხელოვნების ნიმუშები. ამ ნამუშევრების ავტორები არიან: გიგო გაბაშვილი, ელენე ახვლედიანი, მოსე თოიძე და სხვები.

საგამოფენო პროექტის მიზანია: საზოგადოების ყურადღების მიპყრობა ქართული კულტურის, განათლებისა და მეცნიერების ერთ-ერთი უძველესი და უმნიშვნელოვანესი კერის - თბილისის სახელმწიფო სამხატვრო აკადემიის დანგრევის ზღვარზე მყოფი სათაო შენობისადმი; საზოგადოდ, ქართული კულტურით დაინტერესებულ პირებს გააცნოს აკადემიის წიაღში ათწლეულების მანძილზე შექმნილი ხელოვნების სხვადასხვა დარგის მნიშვნელოვანი ნიმუშები.

იდეისა და პროექტის ავტორი - მეცნიერებათა დოქტორი თემურ ბიბილური.
გამოფენა 7თებერვლამდე გაგრძელდება.