ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი ავსტრიის რესპუბლიკაში, ქ. ვენაში სამუშაო ვიზიტის ფარგლებში ეუთო-ს გენერალურ მდივანს ლამბერტო ზანიერს შეხვდა.
შეხვედრაზე მხარეებმა საქართველოს ოკუპირებულ ტერიტორიებსა და მიმდებარე სოფლებში არსებული ვითარება განიხილეს.
როგორც ,,ჯი-ეიჩ-ენს" სახელმწიფო მინისტრის აპარატიდან აცნობეს ალექსი პეტრიაშვილმა ყურადღება გაამახვილა მდინარე ფსოუდან საზღვრის სიღრმეში 11 კილომეტრით გადმოწევასა და 2013 წლის განმავლობაში ცხინვალის რეგიონში საოკუპაციო ხაზების გავლების ფაქტებზე და ხაზი გაუსვა ამ პროცესებთან დაკავშირებით საერთაშორისო თანამეგობრობის მხრიდან პრინციპული პოზიციის დაფიქსირების აუცილებლობას.
„მოვითხოვეთ, რათა ეუთომ და გენერალურმა მდივანმა კიდევ უფრო მეტი პრინციპულობით დააყენოს ეს საკითხები, ისევე როგორც, 2008 წლის შეთანხმების შესრულების აუცილებლობა საქართველოს ტერიტორიებიდან საოკუპაციო ჯარების გაყვანის თაობაზე".-აღნიშნა ალექსი პეტრიაშვილმა.
საქართველოს ევროკავშირში ინტეგრაციის პერსპექტივებზე საუბრისას სახელმწიფო მინისტრმა განსაკუთრებით აღნიშნა საქართველო-ევროკავშირს შორის ასოცირებისა და მისივე შემადგენელი თავისუფალი სავაჭრო სივრცის შესახებ შეთანხმებების ხელმოწერის მნიშვნელობა და ამ პროცესში საქართველოს წინაშე არსებულ გამოწვევებზე ისაუბრა.
შეხვედრაზე მხარეებმა, ასევე, განიხილეს საქართველოს ოკუპირებულ და მიმდებარე ტერიტორიებზე მცხოვრები მოსახლეობისთვის კონკრეტული პროექტების განხორციელების საკითხში ეუთო-ს თანამონაწილეობის შესაძლებლობა.
ეუთოს გენერალურმა მდივანმა გამოთქვა ორგანიზაციის მზადყოფნა ამგვარი პროექტების განხორციელების პროცესში ეუთო-ს ქმედითი მხარდაჭერის თაობაზე.
