15 იანვარს კომპანია PIONIERUL-ის პრეზიდენტი გიდეონ ზელინსკი და კომპანია Varity Cruises აღმასრულებელი პრეზიდენტი იანის ვონტასი საქართველოს ეკონომიკისა და მდგრადი განვითარების მინისტრის მოადგილეს, ნათია მიქელაძეს შეხვდნენ. რუმინულ დელეგაციას თან ახლდა რუმინეთში საქართველოს ელჩი ილია გიორგაძე.
შეხვედრაზე რუმინეთის კონსტანცას ნავსადგურსა და ბათუმისა და ფოთის ნავსადგურებს შორის საბორნე მიმოსვლის დაწყების შესაძლებლობები და მასთან დაკავშირებული ორგანიზაციული საკითხები განიხილეს. მხარეებმა ასევე იმსჯელეს კომპანიების წინადადებებზე აღნიშნული საბორნე ხაზების ოპერირებისა და შესაძლო ინვესტირების თაობაზე.
ნათია მიქელაძის განცხადებით, მოლაპარაკებების დადებითად დასრულების შემთხვევაში, კომპანია გამოთქვამს მზადყოფნას საქართველოს დროშის ქვეშ მცურავი ბორნების მეშვეობით განახორციელოს კონსტანცა-ფოთი/ბათუმის საბორნე ხაზის ოპერირება. მინისტრის მოადგილემ ხაზი გაუსვა საქართველოსთვის საბორნე მიმოსვლის განვითარების მნიშვნელობას და აღნიშნა, რომ ქართული მხარე მზად არის თანამშრომლობის გაღრმავებისთვის აღნიშნული მიმართულებით.
ვიზიტის ფარგლებში სტუმრებმა ასევე მოინახულეს ბათუმისა და ფოთის ნავსადგურები და საქმიანი შეხვედრები გამართეს ნავსადგურების ხელმძღვანელ პირებთან.
