იაპონიის მთავრობა საქართველოს დამატებით 200 მლნ იენს გამოუყოფს. როგორც საქართველოში იაპონიის საელჩოში განმარტავენ, 20 იანვარს, 11:00 საათზე, საქართველოს ფინანსთა სამინისტროში, არასაპროექტო საგრანტო დახმარების ფარგლებში, საქართველოსთვის გამოყოფილი 200 მილიონი იაპონური იენის (დაახლოებით 1.9 მლნ აშშ დოლარი; 1 აშშ დოლარი=105 იენს) ნოტების ურთიერთგაცვლის ხელმოწერის ცერემონია გაიმართება.
ურთიერთგაცვლის ნოტებსა და სხვა საჭირო დოკუმენტაციას ხელს მოაწერენ მისი აღმატებულება იაპონიის საგანგებო და სრულუფლებიანი ელჩი საქaრთველოში ტოშიო კაიტანი და საქართველოს ფინანსთა მინისტრი ნოდარ ხადური.
აღსანიშნავია, რომ არასპროექტო საგრანტო დახმარების ფარგლებში გამოყოფილი თანხა მოხმარდება აღჭურვილობის შეძენას გარემოს დასაცავად და ბუნებრივი კატაკლიზმების თავიდან ასაცილებლად. აღნიშნული საგრანტო დახმარების განხორციელება მნიშვნელოვან წვლილს შეიტანს ბუნებრივი საშიშროების წინასწარ გამაფრთხილებელი სისტემის გაუმჯობესებაში და შეამცირებს რისკებსა და ზარალს, აგრეთვე, საქართველოში იქნება დაცული გარემო უნიკალური, მოქნილი იაპონური ტექნოლოგიების მცირე და საშუალო საწარმოების გამოყენებით.
ამ დროისათვის იაპონიის მიერ უკვე განხორციელდა მთელი რიგი სხვადასხვა სახეობის პროექტებისა, საგრანტო დახმარების, ტექნიკური თანამშრომლობის თუ ოფიციალური განვითარების დახმარების სესხით საქართველოს მთავრობასთან ურთიერთ-თანამშრომლობით ოფიციალური განვითარების დახმარების ფარგლებში. იაპონიის ოფიციალური განვითარების დახმარება საქართველოსათვის შეადგენს 364 აშშ მილიონ დოლარზე მეტს, რაც მოიცავს ეკონომიკური ინფრასტრუქტურის გაუმჯობესებას, სოფლის მეურნეობასა და სოციალურ სექტორს, კულტურასა და ადამიანური რესურსების განვითარებას.
