ეკონომიკური გუნდის წევრებმა საბანკო სექტორის წარმომადგენლებს კიდევ ერთხელ მიაწოდეს ინფორმაცია თუ რა ღონისძიებებს გეგმავს მთავრობა 2014 წელს ეკონომიკის სიტიმულირებისთვის.

ფინანსთა სამინისტროს მხრიდან, შეხვედრაზე განხილვის ერთ-ერთი მთავარი თემა იყო ეკონომიკის სტიმულირებისთვის ფასიანი ქაღალდების ემისიიდან გათვალისწინებული 200,0 მლნ ლარის კომერციული ბანკებისთვის გადაცემის მექანიზმები, რათა ბანკებმა აღნიშნული თანხა მიმართონ ეკონომიკის გრძელვადიანი რესურსით უზრუნველყოფისათვის.

„მნიშვნელოვანია, რომ ბანკების მხრიდან დაინტერესება დიდია. მთავარი ამოცანაა, აღნიშნული მექანიზმის ამოქმედებით, ბანკებს გაუჩნდეთ გრძელვადიანი ფულადი სახსრები, რათა დააფინანსონ არა მხოლოდ სამომხმარებლო, არამედ ბიზნესკრედიტებიც. შევთანხმდით, რომ ტექნიკურ დეტელებზე ჩვენ, ეროვნულ ბანკთან და კომერციულ ბანკებთან ერთად, სამუშაო რეჟიმში გავაგრძელებთ მუშაობას და ვფიქრობთ, რომ თებერვლიდან შესაძლებელი იქნება ამ ინსტრუმენტის ამოქმედება," - განაცხადა ფინანსთა მინისტრმა ნოდარ ხადურმა.

შეხვედრაზე რეგიონული განვითარებისა და ინფრასტრუქტურის მინისტრმა კომერციული ბანკების წარმომადგენლებს მიაწოდა ინფორმაცია 2014 წელს დაგეგმილი ინფრასტრუქტურული პროექტების შესახებ და იმედი გამოთქვა, რომ საბანკო სექტორი აქტიურად ითანამშრომლებს სამინისტროსთან და მის კონტრაქტორ კომპანიებთან ინფრასტრუქტურული პროექტების შეუფერხებლად დაფინანსების მიმართულებით. „ჩვენ 2014 წლის პროექტებზე მოსამზადებელი სამუშაოები უკვე ჩავატარეთ. გამომდინარე აქედან, ტენდერებში გამარჯვებული კომპანიები უზრუნველყოფის გარანტიების მიღების მოთხოვნით ბანკებს წელს უფრო ადრე მიმართავენ. ჩვენი თხოვნაა, უზრუნველყოფის გარანტიებთან დაკავშირებულ პროცედურებში ბანკების მიდგომა გახდეს ლიბერალური. მესმის, რომ არსებობს რისკები, რომლებსაც საბანკო სექტორი ითვალისწინებს, მაგრამ განსაკუთრებით, ქართულ კომპანიებს, რომლებიც ფინანსურად არ არიან ძლიერები, პროექტების განხორციელების პროცესში, ექმნებათ პრობლემები, ვინაიდან მათ უჭირთ საბრუნავი სახსრები. ჩვენ შევთანხმდით, რომ სამინისტრო საბანკო სექტორს მიაწვდის დეტალურ ინფორმაციას რეგიონების მიხედვით თუ რომელი პროექტებია დაგეგმილი, აქედან გამომდინარე, საბანკო სექტორი შეძლებს საკუთარი ფინანსური პოლიტიკის დაგეგმვას,"- აღნიშნა რეგიონული განვითარებისა და ინფრასტრუქტურის მინისტრმა დავით ნარმანიამ.

ეკონომიკისა და მდგრადი განვითარების მინისტრის პირველმა მოადგილემ ისაუბრა მცირე, საშუალო და დამწყები ბიზნესებისთვის ხელშეწყობის მიზნით, მეწარმეობის განვითარების სააგენტოს შექმნის შესახებ. „აღნიშნული სააგენტოს მეშვეობით, ჩვენ ხელი უნდა შევუწყოთ დაწყებითი ბიზნესის განვითარებას საქართველოში. უნდა შევქმნათ საფუძველი, რათა კომერციულმა ბანკებმა მომავალში თავად შეძლონ ახლადშექმნილი ბიზნესების დაკრედიტება," - განაცხადა ეკონომიკისა და მდგრადი განვითარების მინისტრის პირველმა მოადგილემ დიმიტრი ქუმსიშვილმა.

„ძალიან მნიშვნელოვანია, რომ სახაზინო ვალდებულებებიდან 200 მილიონი საბანკო სექტორში განთავსდება, რაც საბანკო სექტორს საშუალება მისცემს გასცეს გრძელვადიანი სესხები და ეს თანხები კვლავ ეკონომიკაში დაბრუნდეს. ეს ძალიან მნიშვნელოვანია და საქართველოს ისტორიაში მსგავსი შემთხვევა არ მახსოვს. მნიშვნელოვანია ისიც, რომ წელს მოხდება მცირე და საშუალო ბიზნესის წახალისება, ე.წ. სტარტაპების დაფინანსება. საბანკო სექტორი მზად არის, ამ ყველაფერს გვერდით დაუდგეს და არსებობს ყველა პირობა იმისათვის, რომ დაგეგმილ ეკონომიკურ ზრდას საფრთხე არ შეექმნას," - განაცხადა ბანკების ასოციაციის პრეზიდენტმა ზურაბ გვასალიამ.

„200 მილიონი ლარის ოდენობის რესურსის გამოყოფა მნიშვნელოვანია, რადგან ეს ბანკებს კომპანიებზე სესხების ლარში გაცემის საშუალებას აძლევს. ნოემბრის თვეში მშპ-ს ზრდა იყო 7,8%-ი, მოსალოდნელია რომ დეკემბერში უფრო მაღალი მაჩვენებელი იქნება, ეს კი იმაზე მიუთითებს, რომ 2014 წელს ეკონომიკა კარგი საწყისი ეტაპით ხვდება და საერთაშორისო სავალუტო ფონდის პროგნოზი 5%-იან ზრდასთან დაკავშირებით სრულიად რეალისტურია. 2014 წელს ეკონომიკის ზრდისთვის მნიშვნელოვანი იქნება სახელმწიფო რესურსები ეფექტურად დაიხარჯოს პირველივე კვარტლიდან," - განაცხადა „თიბისი ბანკის" გენერალურმა დირექტორმა ვახტანგ ბუცხრიკიძემ.

კომერციული ბანკების ხელმძღვანელებთან შეხვედრას დაესწრო ეროვნული ბანკის ვიცე-პრეზიდენტი არჩილ მესტვირიშვილი.