გიგი უგულავას ქვისლი გიორგი ღონიაშვილი ვაკის პარკის მიმდებარედ სასტუმროს მშენებლობასთან და ზოგადად კომპანია "ტიფლის დეველოპმენტთან" კავშირს უარყოფს. როგორც გიორგი ღონიაშვილის განცხადებაშია აღნიშნული, აღნიშნული ჭორის საფუძველი შესაძლოა გამხდარიყო ის, რომ ადრე „Real Invest"-ში მუშაობდა, რომლის ერთ-ერთი მფლობელი გიორგი კაპანაძე რესტორან „ბუდაპეშტის" ერთ-ერთი მესაკუთრეა.
„ვეხმაურები ბრალდებას, თითქოს მე, გიორგი ღონიაშვილი კავშირში ვარ ვაკის პარკის მიმდებარე ტერიტორიაზე სასტუმროს მშენებლობასთან.
მსურს გითხრათ, რომ ეს ინფორმაცია არ შეესაბამება სიმართლეს. არც ახლა და არც წარსულში, არც "ტიფლის დეველოპმენტთან" და არც სასტუმროს ინვესტორთან არანაირი კავშირი არ მქონია. „ტიფლის დეველოპმენტის" წარმომადგენელს, გიორგი ზაქაიძეს, არც კი ვიცნობ.
ჭორის საფუძველი შესაძლოა იყოს ის, რომ წარსულში (2010-2012) ვმუშაობდი კომპანია „Real Invest"-ში, რომლის ერთ-ერთი მფლობელი გიორგი კაპანაძე რესტორან „ბუდაპეშტის" ერთ-ერთი მესაკუთრე გახლდათ. თუმცა ამ ტერიტორიის განკარგვა არასოდეს ყოფილა იმ კომპანიის კომპეტენცია ან ინტერესი, სადაც მე ვიყავი დასაქმებული.
იმედს ვიტოვებ, რომ ამ განცხადების შემდეგ, შეწყდება ცილისმწამებლური კამპანია ჩემი მისამართით და სასტუმროს წინააღმდეგ ორგანიზებული პროტესტის მონაწილენი მეტი პასუხისმგებლობით მოეკიდებიან საკუთარ სიტყვებს"- ნათქვამია გიორგი ღონიაშვილის განცხადებაში.