სახალხო დამცველი უჩა ნანუაშვილი ქუთაისში მიუსაფართა თავშესაფარში შექმნილ ვითარებას ეხმიანება და განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: ,,2014 წლის 9 იანვარს სახალხო დამცველის წარმომადგენლები იმყოფებოდნენ ქუთაისში მიუსაფართათვის სპეციალურად გახსნილ თავშესაფარში. ამ დროისათვის თავშესაფარში განთავსებულია 4 ბენეფიციარი. მიუსაფართათვის გაშლილია 2 კარავი.
ბენეფიციარების განმარტებით რამდენიმე ადამიანმა დატოვა თავშესაფარი გაუსაძლისი პირობების გამო.
სახალხო დამცველის წარმომადგენლების მიერ თავშესაფრის დათვალიერებისას გაირკვა, რომ კარვებში განთავსებულ ბენეფიციარებს უწევთ ანტისანიტარიულ პირობებში ყოფნა, არ არიან უზრუნველყოფილნი პირველადი მოხმარების საგნებით (კოვზი, ჩანგალი, თეფში) წვიმის დროს ჩამოდის წყალი.
როგორც ცნობილია, თავშესაფრის მოწყობა საქართველოს მთავრობის ინიციატივითა და ქუთაისის მერიის ორგანიზებით მოხდა, შესაბამისად სახალხო დამცველი მოუწოდებს ქუთაისის მერიას თავშესაფარში სათანადო პირობების უზრუნველსაყოფად მეტი ყურადღება გამოიჩინოს", _ნათქვამია განაცხადებაში.
