2013 წლის იანვარ-დეკემბრის მონაცემებით, აჭარაში სასტუმროებში დატვირთულობის კოეფიციენტმა 39.37 %-ი შეადგინა, მაშინ როდესაც 2012 წლის მონაცემებით დატვირთულობა 37.78 %-ი იყო. როგორც აჭარის ტურიზმის დეპარტამენტში განმარტავენ, 2013 წელს 2012 წელთან შედარებით დატვირთულობის კოეფიციენტი 4.21%-ითაა გაზრდილი, რაც თავის მხრივ სასტუმროში ტურისტთა რაოდენობის ზრდითაა განპირობებული.
აჭარის ტურიზმის დეპარტამენტის ინფორმაციით, ტურისტთა განთავსების ობიექტები ყველაზე დატვირთული ივლისში იყო, როდესაც დატვირთულობის კოეფიციენტმა 88,08 %-ი შეადგინა. დეკემბერში კი დატვირთულობის კოეფიციენტმა - 10.73 %-ი შეადგინა.
აჭარის ტერიტორიაზე არსებული სასტუმროების მონაცემების მიხედვით, იანვარ-დეკემბერში სასტუმროს მომსახურებით 393 ათას 617 ადამიანმა ისარგებლა, რაც გასული წლის ანალოგიური პერიოდის მაჩვენებელთან შედარებით 9.68%-ითაა გაზრდილი. აჭარის ტურიზმის დეპარტამენტში განმარტავენ, რომ მხოლოდ დეკემბერში აჭარის ტერიტორიაზე სასტუმროს მომსახურებით 9 ათას 915 ვიზიტორმა ისარგებლა.
