თბილისის საკრებულოს ფრაქცია "ნაციონალური მოძრაობა-განახლებული თბილისი''-ს თავმჯდომარე თამაზ შოშიაშვილი საკრებულოს თავმჯდომარის მოადგილის - ჯაბა სამუშიას მიერ გაკეთებულ ასი ახალი ავტობუსის შეძნასთან დაკავშირებულ განცხადებას გამოეხმაურა და საკრებულოს უმრავლესობის წევრები ჩინური კომპანიის ლობირებაში დაადანაშაულა.
"მე მინდა პირდაპირ განვაცხადო - საკრებულოს უმრავლესობის, ქართული ოცნების ფრაქციების მხრიდან მიდის კომპანია "Xiamen Golden Dragon Bus Co"-ს ლობირება. საკრებულოში შედგა არაერთი სხდომა სადაც ამ კომპანიის ხელმძღვანელი ჯერ კიდევ ტენდერის გამოცხადებამდე დაყავდათ და ესწრებოდა შეხვედრებს. ტენდერის ჩატარების შემდეგ ისინი აქტიურად უწევენ ამ კომპანიას ლობირებას. ეს უკვე გასცდა დედაქალაქის თვითმმართველობის ორგანოებს და გადავიდა სხვა სტრუქტურებში. მათი ეს აქტიურობა აჩენს ძალიან ბევრ კითხვის ნიშანს და აქედან გამომდინარე ჩვენ ვსვამთ შეკითხვას - რა ინტერესი აქვს თბილისის საკრებულოს უმრავლესობის წევრებს ამ კონკრეტულ კომპანიასთან და რატომ ითხოვენ ასე ინტენსიურად მის გამარჯვებას!? "Xiamen Golden Dragon Bus Co"-ს გარდა ტენდერში მონაწილეობა კიდევ ოთხმა კომპანიამ მიიღო და მათთან მერიას არანაირი პრეტენზია არ გააჩნია." - განაცხადა თამაზ შოშიაშვილმა.
თბილისის მერიის მიერ გამოცხადებულ 100 ახალი ავტობუსის ტენდერში ხუთმა კომპანიამ მიიღო მონაწილობა. ქ.თბილისის მერიამ ჩინურ კომპანიას დისკვალიფიკაცია მისცა.
