ქალაქ გოაში მდებრე დაგრასას მონასტერში არქეოლოგიური კვლევების შედეგად აღმოჩენილი წმინდა დედოფალ ქეთევანის მარჯვენა ხელის ნაწილის გადმოსაცემად, ინდური მხარე გამოსასყიდის სახით, ერთ მლნ დოლარს ითხოს, - ამის შესახებ ავჭალის, წმინდა ქეთევან წამებულის სახელობის ეკლესიის წინამძღვარმა, მამა გიორგი რაზმაძემ პრესკონფერენციაზე განაცხადა.
დეკანოზის განმარტებით, კვლევებით დადასტურებულია, რომ წმინდა ნაწილი ნამდვილად ქეთევან დედოფლისაა და ახლა საქართველოზეა დამოკიდებული, რამდენად მზადაა სიწმინდის დასაბრუნებლად. მამა გიორგი რაზმაძე ხელისუფლებას, ქეთევან დედოფლის წმინდა ნაწილის ინდოეთიდან საქართველოში დასაბრუნებლად, აქტიურად ჩართვისა და დახმარებისკენ მოუწოდებს.
წმინდა დედოფალი ქეთევანი აშოთან მუხრან ბატონის ასული იყო. შაჰ-აბასის ბრძანებით წმინდა დედოფალი 1624 წლის 26 სექტემბერს აწამეს. თავზე გახურებული რვალის ქვაბი დაამხეს, მარწუხებით მკერდი დააგლიჯეს, მკერდიდან ზურგში გავარვარებული შამფურები გაუყარეს, ფრჩხილები დააძრეს, ხორცი დააგლიჯეს, ლურსმნიან ფიცარზე დააგდეს და ზედაც ლურსმნიანი ფიცარი დააჭედეს. ბოლოს გახურებული ბარით შუბლი გაუპეს. წმინდანის სხეული ჯალათებმა ნადირთა სათრევად დატოვეს. მის წმინდა ნეშტს კი სამი ნათლის სვეტი დაადგა.
წამების მხილველმა კათოლიკური ორდენის წარმომადგენლებმა, ავგუსტინელებმა, წმიდა დედოფლის ნაწილები დიდი პატივით წაასვენეს, საკმევლით და მურით გაჟღენთილ ქსოვილში გაახვიეს და ინდოეთში, ქალაქ გუაში არსებულ დაგრასას მონასტერში გადაასვენეს.
