ახალი წლისა და ზამთრის პერიოდში შიდა ტურისტების მოსაზიდად, აჭარის ტურიზმისა და კურორტების დეპარტამენტი ბათუმის ტურისტულ სააგენტოსთან ერთად სპეციალურ მარკეტინგულ ღონისძიებას ახორციელებს. აჭარის მთავრობის მიერ მხარდაჭერილი პროექტი „უპრეცენდენტო ფასდაკლებების სეზონი აჭარაში" კერძო სექტორის სტიმულირებასა და არასეზონურ პერიოდში შიდა ტურისტების მოზიდვას შეუწყობს ხელს.
27 დეკემბრიდან თებერვლის ბოლომდე აჭარაში ჩამოსულ სტუმრებს შეუძლიათ ისარგებლონ 30%-დან 50%- მდე ფასდაკლებებით რეგიონის სასტუმროებში. პროექტი „უპრეცენდენტო ფასდაკლებების სეზონი აჭარაში" მოიცავს როგორც სასტუმროებს, მათ სერვისსა და პროდუქტს, ასევე სხვადასხვა ტურისტულ ობიექტში ფასდაკლებებს, უფასო კონცერტებსა და კულტურულ ღონისძიებებს.
პროექტში მონაწილეობის მსურველებს შეუძლიათ იხილონ სპეციალურად შექმნილი ვებ-გვერდი: http://batumievents.com და ინფორმაციის მიღებასთან ერთად ისარგებლონ არსებული შემოთავაზებებით.
ახალი წლის აღსანიშნავად, 27 დეკემბრიდან 11 იანვრამდე ბათუმელებისა და მისი სტუმრებისათვის პირველად აჭარაში ევროპის მოედანზე მოეწყობა ევროპული ტიპის საშობაო გამოფენა-ბაზრობა. საახალწლო ნაძვის ხესთან არსებულ სცენაზე ცოცხალი შესრულებით უფასო კონცერტებს „შინი", „მგზავრები", „ფრანი", „Goofy Land", „Svansikh", მუსიკოსი ვაჟა ტუღუში, რეგიონის ფოლკლორული ანსამბლები და სხვა საინტერესო შემსრულებლები ჩაატარებენ.
საახალწლო უფასო კონცერტებს 11 იანვარს დაასრულებს ცნობილი უკრაინული ჯგუფი „ვია გრა".
პროექტის ორგანიზატორები: აჭარის ა.რ მთავრობა, აჭარის ა/რ ტურიზმისა და კურორტების დეპარტამენტი, ა (ა)იპ ბათუმის ტურისტული სააგენტო
საახალწლო ღონისძიებების მხარდამჭერი ორგანიზაციები: ბათუმის მერია, აჭარის ა.რ განათლების, კულტურისა და სპორტის სამინისტრო
საინფორმაციო მხარდაჭერა: აჭარის ტელევიზია, საქართველოს ტურიზმის ეროვნული ადმინისტრაცია
