ამერიკის შეერთებული შტატების მთავრობის საინვესტიციო კორპორაციის „ოპიკი"-ს დაფინანსებით, საქართველოში ამერიკული საავტომობილო სერვისების ფირმა „Precision Tune Auto Care" შემოვიდა. მიმდინარე წლის 18 დეკემბერს, საქართველოს ფინანსთა მინისტრი ნოდარ ხადური დაესწრო კავკასიაში კომპანიის პირველი ფრენჩაიზ ლიცენზიის მფლობელის - „პრესიჟენ ავტო სერვისის" ცენტრის გახსნას.
ამერიკული კომპანია 35 წელზე მეტია, რაც საავტომობილო სერვისების სფეროში მოღვაწეობს და მომხმარებლებს სთავაზობს მულტიბრენდულ, უნივერსალურ საავტომობილო პროფილაქტიკურ სერვისებს. პრესიჟენის ბრენდით მსოფლიოს მრავალ ქვეყანაში 340 სერვის ცენტრი ფუნქციონირებს.
პირველ ეტაპზე, პრესიჟენ ავტო სერვისის ბრენდით საქართველოში ოთხი სერვის ცენტრი იხსნება: თბილისში, რუსთავში, ქუთაისსა და ბათუმში. 2014 წლის განმავლობაში ბრენდი მოიცავს, როგორც საქართველოს დანარჩენ რეგიონებს, ასევე აზერბაიჯანსა და სომხეთს. საქართველოში პრესიჟენის ბრენდის განვითარება შექმნის ახალ სამუშაო ადგილებს, ხელს შეუწყობს აღნიშნულ სფეროში მენეჯმენტისა და ტექნიკური სწავლების საერთაშორისო პროგრამების დანერგვას.
„საქართველოში ბიზნესი გააქტიურდა. მინდა წარმატება ვუსურვო კომპანიას. მნიშვნელოვანია, რომ ამერიკული კაპიტალით და ტექნოლოგიებით აღჭურვილი ეს სერვის ცენტრი მოემსახურება არა მხოლოდ საქართველოს, არამედ მთელს რეგიონს," - განაცხადა ფინანსთა მინისტრმა ნოდარ ხადურმა.
ცენტრის გახსნას დაესწრნენ რეგიონული განვითარებისა და ინფრასტრუქტურის მინისტრი დავით ნარმანია, ეკონომიკისა და მდგრადი განვითარების მინისტრის მოადგილე ქეთევან ბოჭორიშვილი, საქართველოში ამერიკის შეერთებული შტატების ელჩის მოადგილე და სხვა მოწვეული სტუმრები.