არასამთავრობო ორგანიზაცია „ადამიანი, კანონი, თავისუფლების" წევრებმა მოსკოვის გამზირზე კარვებში დაბინავებული უსახლკაროები მოინახულეს. ორგანიზაციის წევრები მიუსაფარ მოქალაქეებს საკვები პროდუქტებით დაეხმარნენ და მათ მდგომარეობას გაეცნენ. გაშლილ კარვებში, 140-მდე უსახლკარო ცხოვრობს. მათ შორის არიან არასრულწლოვნები, დევნილები, მოქალაქეობის არმქონე და შეზღუდული შესაძლებლობის მქონე პირები.
აღსანიშნავია, რომ არასრულწლოვნები განთავსებულნი არიან ცალკე კარავში. ადგილზე 24 საათის განმავლობაში საპატრულო პოლიციის ეკიპაჟი და გადაუდებელი სამედიცინო დახმარების ბრიგადა მორიგეობს. უსახლკარო მოქალაქეებს საჭირო სამედიცინო შემოწმება და შესაბამისი მკურნალობა უტარდებათ. ყველა ახალი მობინადრის განთავსება ხდება სრული სამედიცინო შემოწმების შემდეგ. ადგილზე მუდმივად მორიგეობს რეგიონალური განვითარებისა და ინფრასტრუქტურის სამინისტროს წარმომადგენლები და კოორდინაციას უწევენ მიუსაფართა ჩასახლებას.