პრემიერ-მინისტრი ირაკლი ღარიბაშვილი მინისტრთა კაბინეტის წევრებთან ერთად ჭაბუა ამირეჯიბის სამოქალაქო პანაშვიდზე იმყოფებოდა და ოჯახს მიუსამძიმრა.
სამოქალაქო პანაშვიდზე ასევე იმყოფებოდა პრემიერ-მინისტრის მეუღლეც.
,,მინდა, სამძიმარი გამოვუცხადო არა მხოლოდ ოჯახს, არამედ სრულიად საქართველოს. ის უდიდესი კლასიკოსი იყო, გამორჩეული ადამიანი. მისი შემოქმედება არის არა მხოლოდ ქართული კულტურის, არამედ მთელი მსოფლიოს საგანძური. მისი ლიტერატურული გმირები ზოგადსაკაცობრიო მასშტაბის და ძალიან დიდი მაგალითის მომცემნი არიან. მინდა, კიდევ ერთხელ ვუთანაგრძნო და მივუსამძიმრო სრულიად საქართველოს", - განაცხადა ღარიბაშვილმა.
შეგახსენებთ, რომ მწერალი ჭაბუა ამირეჯიბი 12 დეკემბერს გარდაიცვალა. მას ხვალ, მთაწმინდის პანთეონში დაკრძალავენ.
