დღეიდან, 16 დეკემბრიდან, მართვის მოწმობის აღების ახალი წესი ამოქმედდება.
შინაგან საქმეთა სამინისტროს მომსახურების სააგენტოს ხელმძღვანელის ნინო კობახიძის განაცხადებით, მოსახლეობას საშუალება ექნება, მართვის მოწმობის გამოცდა ავტომატური გადაცემის კოლოფის მქონე სატრანსპორტო საშუალებაზეც ჩააბარონ.
მისი თქმით, მოქალაქეებს გამოცდის ჩაბარება მექანიკური გადაცემის კოლოფის მქონე სატრანსპორტო საშუალებაზე კვლავ შეეძლებათ. ხოლო თუ მოქალაქე გამოცდას ავტომატურ გადაცემათა კოლოფის მქონე სატრანსპორტო საშუალებაზე ჩააბარებს, მას მხოლოდ აღნიშნული სახეობის ტრანსპორტის მართვის საშუალება ექნება.
"მ შემთხვევაში, თუ გამოცდას მექანიკურ გადაცემათა კოლოფის მქონე სატრანსპორტო საშუალებაზე ჩააბარებს, მოქალაქეს უფლება აქვს მართოს როგორც ავტომატური, ასევე მექანიკური გადაცემათა კოლოფის მქონე ავტომობილი," - განმარტა კობახიძემ.
შინაგან საქმეთა სამინისტროს მომსახურების სააგენტო ასევე, სისხლის ბანკთან ერთად სიახლის დანერგვას გეგმავს, რომლის განხორციელების შემთხვევაშიც, მართვის მოწმობაში მფლობელის სისხლის ჯგუფი და რეზუსი მიეთითება.
როგორც ნინო კობახიძემ განაცხადა, სისხლის ბანკის დახმარებით, მომსახურების სააგენტოს ტერიტორიაზე ლაბორატორია განთავსდება, სადაც უახლოეს მომავალში მსურველებს საშუალება ექნებათ მართვის მოწმობის აღებისას უფასოდ მიიღონ ინფორმაცია საკუთარი სისხლის ჯგუფისა და რეზუსის შესახებ, ხოლო დონორობის შემთხვევაში, მათ ოთხი სახეობის ვირუსზე უფასო გამოკვლევის ჩატარების საშუალება ექნებათ.
2014 წლიდან შს სამინისტროს მომსახურების სააგენტო განათლების სამინისტროსთან ერთად საჯარო სკოლებში საგზაო ნიშნებისა და მოძრაობის უსაფრთხოების წესების სწავლების შემოღებას გეგმავს. აღნიშნული საგნების მაღალკლასელთათვის სკოლებში შესწავლა, სავალდებულო ხასიათს მიიღებს.