„არსებითად ეს არის ჩვენი ყოველწლიური ყრილობა, - განაცხადა პროფ. გიორგი (გოგი) დოლიძემ, - მაგრამ საგანგებოდ ვერიდებით ასეთ მქუხარე ტერმინებს. უბრალოდ გაიმართება საუბარი იმის თაობაზე, თუ რას მივაღწიეთ ამ 8 წლის განმავლობაში და იმ პრობლემებზეც, რომლებზეც ვაპირებთ მომავალში გავაგრძელოთ ჩვენი აქტიურობა. საამაყო ნამდვილად ბევრი გვაქვს: დავიწყოთ თუნდაც იმით, თუ რა სანიმუშო ურთიერთობა ჩამოგვიყალიბდა ჩოხატაურის რაიონის სოფ. შუა ამაღლების საჯარო სკოლასთან (დირექტორი - სამსონ ჯიბუტი)... სადაც გავხსენით „წიგნის მოყვარულთა კლუბი", ხოლო ამ კლუბის წევრებისათვის ბუფეტიც უფასოა და ბავშვები მიირთმევენ ჩაის, კანფეტსა და ფუნთუშას... ამ კლუბისათვის შევქმენით აგრეთვე წიგნების საგანგებო ფონდი, რომელშიც შედის მხოლოდ ის ახალ-ახალი წიგნები, რომლებსაც სკოლას უგზავნიან თანამედროვე ქართული ლიტერატურისა და ხელოვნების თვალსაჩინო მოღვაწეები: ჭაბუა ამირეჯიბი, რეზო ჩხეიზე, ვაჟა აზარაშვილი, თემო გოცაძე, არნოლდ გეგეჭკორი, ვაჟა ოთარაშვილი და სხები... ყოველ თვეში ჩაგვყავს ისეთი ცნობილი მოღვაწეები, როგორიც არიან: მსოფლიო მოღვაწეები ჯუმბერ ლეჟავა, თუ შესანიშნავი მოცეკვავე, საქართველოს სახალხო არტისტი თენგიზ უთმელიძე და სხვები. რაც მთავარია, სკოლასთან ერთად გამოვცემთ ყოველკვარტალურ გაზეთს სახელწოდებით „გურიის მთები", რაც უნიკალურია მთელ საქართველოში - როგორც ცნობილია, ქვეყანაში არსებობს 2500 საჯარო სკოლა და არც ერთ მათგანს არ ააქვს პერიოდული გამოცემა, ეს მხოლოდ ამ სკოლის პრეროგატივაა. 10 დეკემბერს უნდა ჩაგვეტარებინა სკოლის 110 წლის იუბილე, მაგრამ, სამწუხაროდ, მკაცრი კლიმატური პირობების გამო, იძულებული გავხდით გადავიტანოთ ზაფხულისათვის.
ასევე გვეამაყება, რომ სწორედ ჩვენ აღვადგინეთ დიდი ქართველი მოაზროვნის - სოლომონ დოდაშვილისადმი მიძღვნილი, მაგრამ, სამწუხაროდ, მივიწყებული სახალხო დღესასწაული `სოლომონობა" და ახლა, ფილოსოფიის ინსტიტუტის, საჯარო ბიბლიოთეკის და სხვათა მხარდაჭერით ვემზადებით, რომ 20 დეკემბერს ს. დოდაშვილის მშობლიური სოფლის მაღაროს საჯარო სკოლაში, რომელიც მის სახელს ატარებს, გავხსნათ დოდაშვილის სასკოლო სახლ-მუზეუმი, რადგანაც, როგორც ცნობილია, ჩვენდა სამარცხვინოდ, საქართველოში დღემდე არ არსებობს ს. დოდაშვილის, ილია ჭავჭავაძის სიტყვებით რომ ვთქვათ, ეროვნულ-განმათავისუფლებელი მოძრაობის პირველი მედროშისა და საქართველოში ევროპეიზმის ფუძემდებლის სახლ-მუზეუმი.
ისიც გვეამაყება, რომ სწორედ ჩვენ აღვადგინეთ ასევე მივიწყებული სახალხო დღესასწაული „მარაბდობა", ყოველწლიურად 1 ივლისს აღვნიშნავთ მარაბდის ისტორიული ბრძოლის წლისთავს და 5 წლის აქტიური მოთხოვნის შედეგად, უკვე ოფიციალურად გადმოგვეცა „ცხრა ძმა ხერხეულიძის მემორიალი", თეთრიწყაროს რაიონის სოფ. მარაბდაში და მომავალ წელს იქ გავხსნით მარაბდის აკადემიას, რომელიც მოსწავლე-ახალგაზრდობის აღზრდის მძლავრ ცენტრად გადაიქცევა.
აი, ამ და სხვა პრობლემებზე იქნება საუბარი ჩვენს საიუბილეო საღამოზე, რომელიც დაგვირგვინდება დიდი კონცერტით, მასში მონაწილეობას მიიღებენ, როგორც ჩოხოსნები, ისე თანამედროვე ლიტერატურისა და ხელოვნების გამოჩენილი ოსტატები.