ასევე გაიმართა სახალხო დამცველის აპარატის ახალი ვებ-გვერდის პრეზენტაცია და დისკუსია.

სახალხო დამცველის ანგარიშში აღნიშნულია, რომ ,,სახალხო დამცველისადმი მომართვიანობამ წინა წლებთან შედარებით იმატა, რაც აპარატის საქმიანობის გააქტიურებისა და ცნობადობის ამაღლების მაჩვენებელია. დღემდე შემოსულია 5457 განცხადება. სახალხო დამცველთან პირადად შეხვედრის შესაძლებლობა მიეცა 320 ადამიანს.

აპარატის საქმიანობის გაუმჯობესების მიზნით რამდენიმე სიახლე განხორციელდა: დაინერგა საქმისწარმოების ერთიანი ელექტრონული პროგრამა; დაიწყო კვალიფიციური იურიდიული კონსულტაციის მიწოდება და სამართლებრივი დოკუმენტაციის შედგენა, რაც მოიცავს ადგილობრივ და საერთაშორისო დონეზე ადამიანის უფლებების დაცვის მექანიზმებზე ამომწურავი ინფორმაციის მიწოდებას; მოხდა არქივის სისტემატიზიცია; განახლდა ვებ-გვერდი.

შეიცვალა აპარატის სტრუქტურა, გაიზარდა აპარატში მომუშავეთა რიცხვი. ქალის, ბავშვისა და შშმ პირთა უფლებათა დაცვის ცენტრი 3 ცალკეულ სტრუქტურულ ერთეულად ჩამოყალიბდა: ბავშვის უფლებების ცენტრი, შშმ პირთა უფლებების ცენტრი, გენდერული თანასწორობის დეპარტამენტი. ანგარიშში კარგად არის ასახული ცენტრებისა და გენდერული თანასწორობის დეპარტამენტის მუშაობა.

გაფართოვდა პრევენციის ეროვნულ მექანიზმი. კონკურსის საფუძველზე მონიტორინგში მონაწილე 40 დარგობრივი ექსპერტი შეირჩა. ამასთან, განახლდა დახურული დაწესებულებების მონიტორინგის მეთოდოლოგია. მიმდინარე წელს განხორციელდა 290 ვიზიტი - სასჯელაღსრულების დაწესებულებებში; 88 ვიზიტი პოლიციის განყოფილებებში და იზოლატორებში; 4 ვიზიტი სამხედრო ჰაუპტვახტში; 6 ვიზიტი ფსიქიატრიულ დაწესებულებებში.

მიმდინარე წელს საქართველოს სახალხო დამცველმა რამდენიმე საკანონმდებლო წინადადებითა და განცხადებით მიმართა საქართველოს მთავრობას და საქართველოს პარლამენტს. აგრეთვე წარადგინა სასამართლო მეგობრის (Amicus Curiae) მოსაზრება და საკონსტიტუციო სარჩელები.

სახალხო დამცველმა 111 რეკომენდაციით მიმართა სხვადასხვა უწყებებს ადამიანის უფლებების დარღვევის ფაქტებთან დაკავშირებით. 138 სასამართლო პროცესის მიმდინარეობაზე განახორციელა მონიტორინგი.

სახალხო დამცველის აპარატთან არსებულ ტოლერანტობის ცენტრი მუდმივ კოორდინირებას და მხარდაჭერას უწევს რელიგიური და ეროვნული უმცირესობების საბჭოების საქმიანობას.

საგანმანათლებლო მიზნებისათვის მიმდინარე წელს საზოგადოებრივ მაუწყებლის ტელე და რადიო ეთერში პერიოდულად გადის სოციალური რეკლამა; ჩატარდა კონკურსი „მე ომბუდსმენი 2013"; ვიქტორინა „ეთნოსები და რელიგიები საქართველოში 2013"; მედია კონკურსი „ტოლერანტობა და მრავალფეროვნება 2013";
გაიმართა ტრენინგები/სემინარები/დისკუსიები/მრგვალი მაგიდები: შეხვედრები მოსწავლე-ახალგაზრდობასთან, სტუდენტებთან, რექტორებთან, პედაგოგებთან ადამიანის უფლებებისა და თავისუფლებების დაცვის მდგომარეობის შესახებ.

გაღრმავდა თანამშრომლობა საერთაშორისო ორგანიზაციებთან და პარტნიორებთან. შედგა ომბუდსმენთა მეორე სამიტი აღმოსავლეთ პარტნიორობისა და ევროპის კავშირის ფარგლებში; ნატო-საქართველოს კომისიის სხდომა პოლიტიკური და პარტნიორობის კომიტეტის დონეზე; აზიის ომბუდსმენთა ასოციაციის მე-13 კონფერენცია; ადამიანის უფლებათა ეროვნული ინსტიტუტების სტრატეგიული შეხვედრა;

განსაკუთრებით აღსანიშნავია ის ფაქტი, რომ საქართველოს სახალხო დამცველის ინსტიტუტს ადამიანის უფლებათა დაცვისა და ხელშეწყობის ეროვნული ინსტიტუტების საერთაშორისო საკოორდინაციო კომიტეტის ფარგლებში „A" სტატუსი მიენიჭა და 3 წლის ვადით იქნა არჩეული ევროპის ადამიანის უფლებათა დაცვის ეროვნული ინსტიტუტების ჯგუფის საკოორდინაციო კომიტეტის წევრად.

შეიქმნა საქართველოს სახალხო დამცველის საერთაშორისო მრჩეველთა საბჭო - 4 მოწვეული საერთაშორისო ექსპერტი იკრიბება წელიწადში ორჯერ და კონსულტაციას უწევს საქართველოს სახალხო დამცველს ადამიანის უფლებადარღვევებზე ეფექტურ რეაგირების მექანიზმებზე", _ნათქვამია სახალხო დამცველის ანგარიშში.