2013 წლის11 დეკემბერს ჟენევაში ერების სასახლეში საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი დავით დარახველიძე გაეროს ლტოლვილთა უმაღლესმა კომისარმა ანტონიო გუტიერეშმა მიიღო.
შეხვედრაზე განიხილეს საქართველოში დევნილთა და ლტოლვილთა პრობლემები და მათი მოგვარების გზები და საშუალებები. საუბარი შეეხო აგრეთვე გამყოფი ადმინისტრაციული ზოლის მიმდებარე ტერიტორიაზე მცხოვრები მოსახლეობის საკითხებს, დევნილთა შესახებ ახალი კანონპროექტის მნიშვნელობას და დევნილთა განსახლებისა და სხვა გამოწვევების გადასაჭრელად ფინანსური დახმარების მიზნით, გლუკის შუამდგომლობას საერთაშორისო საფინანსო და დონორი ორგანიზაციების წინაშე.
უმაღლესმა კომისარმა მაღალი შეფასება მისცა საქართველოს ახალი მთავრობის სტაბილურ ეკონომიკურ საქმიანობას პოლიტიკური საკითხებისგან დამოუკიდებლად და მაქსიმალური მხარდაჭერა გამოხატა.
შეხვედრაში ასევე მონაწილეობა მიიღეს გლუკის ევროპის ბიუროს დირექტორმა ვინსენტ კოშეტელმა, გლუკის საქართველოს მისიის ხელმძღვანელის მოადგილემ ჰაი შელოუმ. საქარველოს მხრიდან ჟენევაში გაეროს ოფისებში საქართველოს მუდმივმა წარმომადგენელმა შალვა ცისკარიშვილმა, მინისტრის მოადგილემ ნინო ჭავჭავაძემ, საერთაშორისო ურთიერთიერთობების დეპარტამენტის უფროსმა თამარ ბასილიამ.
საქართველოს მთავრობის მიერ 2014 წელს უმაღლესი კომისარი ბატონი ანტონიო გუტიერეში მოწვეულია საქართველოში.
