აჭარის მთავრობის თავმჯდომარემ არჩილ ხაბაძემ და აჭარის სოფლის მეურნეობის მინისტრმა ზაურ ფუტკარაძემ სოფელ მახოში ციტრუსის მიმღებ-დამხარისხებელ საწარმო მოინახულეს. საწარმო საათში 10 ტონა მანდარინს ახარისხებს. დღეის მდგომარეობით რეგიონში 36 დამხარისხებელ-შემფუთავი პავილიონი ფუნქციონირებს.
სახელმწიფოს პოლიტიკიდან გამომდინარე მიმდინარე წელს მეციტრუსე ფერმერების დაფინანსების მოცულობა უპრეცენდენტო იქნება. საქართველოს მთავრობის ბიუჯეტიდან გამოიყოფა 12 000 000 ლარი სტანდარტული მანდარინის დასაფინანსებლად. ხოლო აჭარის მთავრობა გამოჰყოფს 1800 000 ლარს არასტანდარტული მანდარინის რეალიზაციის თანადაფინანსებისთვის.
მეციტრუსე ფერმერები დაფინანსდებიან 15 თეთრით 1 კგ სტანდარტულ მანდარინზე, თუ მანდარინის შესყიდვა მოხდება არანაკლებ 35 თეთრად. აღნიშნული პრინციპით დაფინანსდებიან აჭარაში, გურიასა და სამეგრელოს რეგიონების მუნიციპალიტეტებში მცხოვრები მეციტრუსე ფერმერები.
საბოლოო ჯამში რეგიონში მცხოვრები მეციტრუსე ფერმერები მიიღებენ 43 600 000 ლარს, მათ შორის 3 600 000 ლარს არასტანდარტული მანდარინის რეალიზაციიდან და 40 მილიონ ლარს სტანდარტული მანდარინის რეალიზაციიდან (28 000 000 ლარს შემსყიდველისგან და 12 000 000 ლარს სახელმწიფო დოტაციის სახით).
ააიპ სოფლის მეურნეობის პროექტების მართვის სააგენტო მე-6 კომპონენტის ფარგლებში ახორციელებს პროექტს „შეღავათიანი აგროკრედიტი მანდარინის შემსყიდველი საწარმოებისთვის". პროექტის ღირებულებაა 30 000 000 ლარი. აღნიშნული თანხა მოიცავს შემსყიდველი საწარმოების სესხის თანადაფინანსებას, სადაც სახელმწიფო ფარავს სესხის 9%-ს 4 თვის განმავლობაში.
აჭარის მთავრობის ინიციატივით მოქმედებს საინფორმაციო ცენტრი. ნებისმიერ ფერმერს და მეწარმეს შეუძლია ციტრუსთან და დაფინანსებასთან დაკავშირებული ინფორმაციის მოპოვება შემდეგ ნომრებზე: 24-78-41 (აჭარის სოფლის მეურნეობის სამინისტრო); 27-28-41 და 27-28-43 (საინფორმაციო ცენტრი).
