ზესტაფონის ბაზრის მოვაჭრეებს, რომლებსაც პარლამენტის შესასვლელი პიკეტირებული აქვთ, საპარლამენტო უმრავლსობის წევრი ლევან ბერძენიშვილი ეხმიანება. ბერძენიშვილის თქმით აღნიშნული საკითხით ქალაქის მაჟორიტარი დეპუტატი გაგო ქავთარაძე უნდა დაინტერესდეს, რომელმაც პრობლემების მოგვარების შესაბამის კომიტეტებს უნდა მიმართოს.
„შევხვდი ამ ადამიანებს და მითხრეს პრობლემები, რომლებიც მათ აქვთ. სამწუხაროა, რომ დეტალები არ ვიცი რა ხდება რეალურად ზესტაფონში. აღნიშნული პრობლემა საფუძვლიანად უნდა შეისწავლოს ქალაქის მაჟორიტარდმა დეპუტატმა და შესაბამის კომიტეტებს წარუდგინოს. თუ მათ უკვე მიმართეს მაჟორიტარს და პრობლემები პრობლემებად დარჩა, მაშინ საკუთარი უფლებების დასაცავად სახალხო დამცველს უნდა მიმართონ", - განაცხადა ლევან ბერძენიშვილმა.
შეგახსენებთ, რომ ზესტაფონის ბაზრის მოვაჭრეები პარლამენტის შენობის შესასვლელთან მჯდომარე აქციას მართავენ და იმუქრებიან, რომ დეპუტატებს შენობაში შესვლის საშუალებას არ მისცემენ.
