ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ სამინისტროს სათათბირო საბჭოს სხდომა გამართა. სათათბირო საბჭომ 6 საკითხი განიხილა, მათ შორის ერთ-ერთი მნიშვნელოვანი თემა იყო სხვადასხვა შენობებში უკანონოდ შეჭრა და ობიექტების თვითნებური დაკავება.
როგორც დავით დარახველიძემ აღნიშნა, ბოლო პერიოდში ისევ აქტიური ხასიათი მიიღო გარკვეული ჯგუფების მხრიდან იმ შენობებში შეჭრამ, რომლის რეაბილტაციასაც სამინისტრო დევნილი მოსახლეობის გრძელვადიანი განსახლებისთვის იწყება. „ყურადღება გავამახვილეთ ერთ მნიშვნელოვან თემაზე, რაც საბოტაჟის ნიშნებს შეიცავს. ეკონომიკის სამინისტროს მხრიდან ჩვენთვის გადმოცემულ ობეიქტებში, რომლებიც დევნლებსთვის უნდა გავარემნტოთ, დაიწყო საბოტაჟის ნიშნების მატარებელი შეჭრის ახალი ტალღა. ეს ხორციელდება გარკვეული ძალების მიერ. შენობების თვითნებურად დაკავება ხდება არა დევნილთა კონტიგენტის გამოყენებით, არამედ ე.წ. სოციალურად დაუცველების მხრიდან. ბოლო დღეების მანძილზე, ისინი მასიურად შეიჭრნენ იმ ობიექტებში, სადაც სამინისტრომ სამშენებლო სამუშაოები უკვე დაიწყო" - აღნიშნა მინისტრმა.
დავით დარახველიძემ ის ობიექტებიც დაასახელა, რომლებიც სხვადასხვა ჯგუფებს თვითნებურად აქვთ დაკავებული. ეს არის რუსთავში, ყოფილი ტექნიკური უნივერსიტეტის შენობა; თბილისში სამი შენობა; ზუგდიდში რამდენიმე ობიექტი და აღნიშნა, რომ სიტუაცია მართულია: „აშკარაა, რომ ეს არის ასევე მართული პროცესი, როგორც გასული წლის შემოდგომაზე. აღნიშნული ქმედებით ილახება იმ დევნილთა უფლებები, რომლებიც 19 წლის მანძილზე პატიოსნად ელოდებიან თავიანთ რიგს. სამწუხაროდ, სამშენებლო სამუშაოების დაწყებაში ხელს გვიშლიან და პროცესი ჭიანურდება."
მინისტრმა იმედი გამოთქვა, რომ სხვადასხვა უწყებებთან ერთად აღნიშნული პრობლემა მოგვარდება და დევნილი მოსახლეობის განსახლები პროცესი არ შეფერხდება.
რაც შეეხება სათათბირო საბჭოზე განხილულ სხვა საკითხებს, სამინისტროში დღეს ასევე იმსჯელეს დევნილთა განსახლების საკითხის მიმდინარეობაზე; მოისმინეს რეგიონული სამმართველოების ანგარიში მიმდინარე და დაგეგმილ აქტივობებთან დაკავშირებით; განიხილეს იმერეთში დევნილი მოსახლეობისთვის დასრულებული მშენებლობების და დევნილი მოსახლეობის საცხოვრებელი პირობების გაუმჯობესების საკითხები.
დევნილთა სამინისტროს სათათბირო საბჭო არის ორგანო, რომელიც მიმდინარე საკითხებს ოპერატიულად განიხილავს. სათათბირო საბჭო თვეში ერთხელ იკრიბება, თუმცა, აუცილებლობის შემთხვევაში, შესაძლებელია სხდომა თვეში რამდენჯერმე ჩატარდეს.